Ձեր վստահելի աղբյուրը

«Կաթնային յուղ պարունակող կաթնամթերքը մինչև հիմա ոչ մի ձևով չի առանձնացվում վաճառակետերի դարակաշարերում կամ փաթեթավորման վրա տեսանելի կերպով այն չի երևում»,- ԱԺ տնտեսական հարցերի մշտական հանձնաժողվում ասաց ՀՀ էկոնոմիկայի նախարարի տեղակալ Ռաֆայել Գևորգյանը՝ զեկուցելով «Առևտրի և ծառայությունների մասին» օրենքում լրացումներ կատարելու և «Վարչական իրավախախտումների վերաբերյալ» օրենսգրքում լրացումներ կատարելու մասին օրենքի նախագծերը:

Նրա խոսքով՝ սպառողը ցանկության դեպքում արտադրանքի բաղադրության մեջ կգտնի «կաթնային յուղ» ձևակերպումը բայց այն հեշտ տեսանելի չէ:

«Տվյալ օրենքով առաջարկում ենք կաթնային յուղ պարունակող պանիրը, թթվասերը և այլ կաթնամթերքները դարակաշարերում առանձնացնել, որպեզի սպառողին շփոթության մեջ չգցեն»,- ասաց Գևորգյանը և բացատրեց, որ կաթնային յուղը որպես հումք շատ ավելի էժան է, քան բնական կաթը, բայց նույն գնով է վաճառվում, ինչ բնական կաթից պատրաստված կաթնամթերքը:

Նրա խոսքով՝ առաջարկվում է դարակաշարերում առանձնացնել կաթնային յուղ պարունակող մթերքը, որպեսզի սպառողը հստակ իմանա, թե ինչ է գնում:

Փոխնախարարը նաև հայտնեց, որ հնարավոր է հարցը լուծել պիտակի վրա համապատասխան նշում կատարելով, և փոքր խանութների սեփականատերերին կամ արտադրողներին լրացուցիչ դարակաշարեր ապահովելու ծախսից զերծ պահել, բայց քանի որ դա պետք է արվի տեխկանոնակարգերի փոփոխությամբ, և ԵԱՏՄ-ում այն արվում է միասնաբար՝ բոլոր երկրների համար, ապա մինչև հարցին նման լուծոմ տալն առաջարկվում է դարակաշարերի տարբերակ ներմուծել:

Ռաֆայել Գևորգյանը հայտնեց, որ այդ հարցով ԵԱՏՄ երկրների հետ քննարկումներ արել են , բայց այն խնդիրներ է առաջացրել Բելառուսի համար, որը գտնում է՝ պահանջը իր տնտեսվարողի համար լրացուցիչ ծախսեր է առաջացնում:

Հանձնաժողովի անդամներն առաջարկեցին օրենքով տարբերակել մեծ և փոքր խանութները, քանի որ մարզերի խանութների մեծ մասը դարակաշարեր ապահովելու համար չեն կարող գումարներ հատկացնել:

Փոխնախարարը տեղեկացրեց, որ խոշոր տնտեսվարողներն արդեն դարակաշարերն առանձնացրել են, բայց պատգամավորները պնդեցին, որ նախագիծը 2 ամսով հետաձգվի և խմբագրումներով տարանջատվեն մեծ և փոքր խանութները:

Հանձնաժողովը որոշեց 2 ամսով հետաձգել: