Ձեր վստահելի աղբյուրը

ԱԺ պետական-իրավական հարցերի մշտական հանձնաժողովի հերթական նիստում առաջին ընթերցմամբ քննարկվել է կառավարության հեղինակած ««Հանրային ծառայության մասին» օրենքում փոփոխություն կատարելու մասին» օրենքի նախագիծը:

Նիկոլ Փաշինյանի աշխատակազմի սփյուռքի գործերի գլխավոր հանձնակատար Զարեհ Սինանյանը, ներկայացնելով փոփոխություն կատարելու անհրաժեշտությունը, նշել է, որ դա պայմանավորված է կառավարության հնգամյա ծրագրի այն պահանջով, ըստ որի սահմանվել է ստեղծել Սփյուռքի գործերի հանձնակատարի ինստիտուտ: Սփյուռքի գործերի հանձնակատարները նշանակվում են վարչապետի որոշմամբ՝ սփյուռքի գործերի գլխավոր հանձնակատարի առաջարկությամբ՝ օտարերկրյա պետություններում հասարակական հիմունքներով խորհրդականի կարգավիճակով:
Նրանք չեն վարձատրվում, չունեն նորմավորված աշխատանքի ևաշխատաժամանակի ռեժիմ:

«Գլխավոր հանձնակատարն ինձ արձագանքելով՝ իրենից հորինեց մի բան, որ ես թերագնահատում եմ Սփյուռքի դերը, թերագնահատում եմ Սփյուռքը, սկսեց դրա հիման վրա անել դատողություններ։ Անելով սխալ, աբսուրդ գնահատական՝ դրա վրա  կառուցեց իր ամբողջ հետագա ասելիքը։ Ոչ ոք ձեզ իրավունք չի տվել նման եզրակացություններ կատարել ու նման գնահատականներ տալ»,- դիմելով Սինանյանին՝ ասաց «Հայաստան» խմբակցության պատգամավոր Աղվան Վարդանյանը։

Անդրադառնալով սփյուռքի հանձնակատարի մեկ այլ հայտարարությանը, թե ի՞նչ են հաջողել նախկինները Սփյուռքում, ձախողել են, նշեց.«Գիտեք, սա դպրոցական աշակերտի համար, որը կրկնում է բառացի  ինչ-որ ասում է քաղաքական ղեկավարությունը նախկինի մասին, գուցե դրվատելի է, բայց գալ, Սփյուռքի հետ աշխատանքը համակարգել ու սկսել իր զրոյական կետից, ևս աբսուրդ է։ Ուզում եմ հարցնել՝ դուք ի՞նչ եք արել 3-3,5 տարվա ընթացքում Սփուռքի դերակատարության, մասնակցության, կազմակերպման ուղղությամբ»։

Նա հարցադրում արեց, թե ի՞նչ չափորոշիչներով պետք է որոշվեն սփյուռքի գլխավոր հանձնակատարի «հանձնակատարների ամբողջ բույլը»։

«Ի՞նչ չափորոշիչներով եք որոշելու, որ, օրինակ, այս ինչ երկրում սփյուռքի  գլխավոր հանձնակատարի ներկայացուցիչը պետք է լինի այս մարդը»,- ասաց Ա. Վարդանյանը։

Նա նշեց, որ նախկինում եղել են դեպքեր, երբ մեծ նվիրատվություն, որոշ կապեր ունեցող որևէ մեկն ինչ որ տեղ նշանակվում է  պատվո հյուպատոս։

«Ես կարո՞ղ եմ ողջամիտ կասկած, ենթադրություն ունենալ, որ սկսվելու է մի մեծ մրցակցություն վարչապետի կողմից նշանակված գլխավոր  հանձնակատարի հանձնակատարի «կարգավիճակին» արժանանալ համար և արդյո՞ք պետք է նրանք մասնակցություն ունենան տարբեր հարցերում։ Ո՞նց եք միայնակ որոշելու սփյուռքի մասին ձեր խիստ կասկածելի, նախորդ ամբողջ աշխատանքը զրոյացնող պատկերցումներով»,- ասաց պատգամավորը։

Ա. Վարդանյանի խոսքով, մտավախություն ունի, որ սա ինչ որ առումով վերածվելու է բոլշևիկների ժամանակվա կոմիսարների։

Ըստ նրա, ԱԳՆ-ն շատ ճիշտ է արել, որ օրենքի նախագծից հանել է առանձին դեպքերում հանձնակատարները կարող են նշանակվել տվյալ օտարերկրյա պետության հետ ձեռքբերված պայմանավորվաությամբ։

«Եթե դուք ասում եք, որ ԱԳՆ օրենքի նախագծից հանել է այս ձևակերպումը, բայց գործելու ենք այս սկզբունքով, հարց է առաջանում՝ ո՞վ է այս սկզբունքով աշխատելու, օտարերկրյա տվյալ պետության հետ ո՞վ է պայմանավորվորվելու, ինչպե՞ս եք պատկերացնում, այս մեխանիզմն ինչպե՞ս է աշխատելու»,- հարցադրումներ արեց Աղվան Վարդանյանը։