Ձեր վստահելի աղբյուրը

«Խիստ խնդրահարույց է վայրի կենդանիներին կիսաազատ և անազատ պայմաններում պահելու ներկա իրավիճակը, գործող օրենսդրությունը լիարժեքորեն չի կարգավորում այդ հարցերը և բացերը»,- Տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովում հայտնեց Շրջակա միջավայրի նախարարի տեղակալ Գայանե Գաբրիելյանը՝ ներկայացնելով «Կենդանական աշխարհի մասին» օրենքում և հարակից օրենքների փաթեթում փոփոխություններ և լրացումներ կատարելու մասին նախագիծը:

Նրա խոսքով՝ խնդիրն առավել էական տեսանելի է դարձել 2015 թվականին՝ Գյումրու մասնավոր կենդանաբանական այգու դեպքերի լայն հնչեղության արդյունքում, որից հետո շահագրգիռ կազմակերպությունների ներկայացուցիչներից ձևավորվել է աշխատանքային խումբ, որոնց առաջարկներն էլ դրվել են նախագծի հիմքում:

Փոխնախարարը հայտնեց, որ  համապատասխան գործունեության թույլտվությամբ սահմանվելու են հատուկ պայմաններ և պահանջներ, որոնք սահմանափակելու են ոչ մասնագիտական մոտեցմամբ վայրի կենդանիների անազատ պամաններում պահելը:

Գաբրիելյանի խոսքով՝ նման գործունեություն ծավալողների համար սահմանվել է հաշվետվողականության մեխանիզմ, որի շրջանակում նաև կենդանիները հաշվառվելու են, իսկ այդ տվյալները փոխանցվելու են լիազոր մարմնին:

«Օրենքում սահմանված է անցումային դրույթ, ըստ որի, 12 ամիս ժամանակ է տրվելու, որպեսզի բոլորը հաշվառման ներկայացնեն իրենց մոտ պահվող վայրի կենդանիները՝ անկախ ձեռքբերման մասին առկա փաստաթղթերից»,- ասաց փոխնախարարը:

Նրա խոսքով՝ նախագծով սահմանվում է, որ վայրի կենդանի կարող են ձեռք բերել միայն լիազոր մարմնից այն պահելու թույլտվություն ունեցողները և սահմանվելու են այն վայրերը, որտեղ կարելի է զբաղվել վայրի կենդանիների առքուվաճառքով:

«Արգելվելու է սահմանված ցանկում ընդգրկված վայրի կենդանիների օգտագործումը կրկեսներում»,-տեղեկացրեց փոխնախարարը և հավելեց, որ օրենսդրական փաթեթով որոշ կենդանիների համար կսահմանվի պահման բնօգտագործման վճարներ:

Նա հայտնեց, որ փոփոխություններով կենսաթոշակային տարիքի մարդկանց համար սիրողական ձկնորսությունն անվճար կդարձվի՝ սոցիալական խնդիրների լուծմանը նպաստելու համար:

ԱԺ փորձագետ Իգոր Սարգսյանն էլ հայտարարեց, որ «Կենդանական աշխարհի մասին» նախկին օրենքն այնքան էլ վատ չէր, որ փոփոխվեր, իհարկե որոշ փոփոխություններ պետք էին:

Փորձագետը մի շարք դիտողություններ ներկայացրեց նախագծերի վերաբերյալ, մասնավորապես, նշելով, որ «Առողջապահական նպատակներով կենդանիների օգտագործում» նոր եզրույթի ներմուծումը նպատակահարմար չէ, քանի որ  գործող օրենքում կա կենդանիների «գիտահետազոտական» և «արդյունագործական» օգտագործման եզրույթները, որոնցում արդեն առկա է առողջապահական նպատակներով օգտագործման երևույթը:

Հանձնաժողովի նախագահ Վահե Ղալումյանը Իգոր Սարգսյանին առաջարկեց հիմնավոր դիտարկումները գրավոր ներկայացնել և այն կդիտարկվի օրինագիծն առաջինից երկրորդ ընթերցման ժամանակ, որից հետո հանձնաժողովը քվեարկությամբ ընդունեց այն: