Ձեր վստահելի աղբյուրը

«Երևան քաղաքում տեղական ինքնակառավարման մասին» օրենքում լրացումներ կատարելու մասին օրենքի նախագծով առաջարկվում է Երևանի քաղաքապետի տեղակալի հաստիք ավելացնել՝ գլխավոր ճարտարապետի հաստիքը կրճատելու հաշվին։ Օրենքում առաջարկվող փոփոխությունները Ազգային ժողովի տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովի նիստում ներկայացրեց ՀՀ տարածքային կառավարման և ենթակառուցվածքների փոխնախարար Վաչե Տերտերյանը։

Նա նշեց, որ նախագծի նախաձեռնությունը Երևանի քաղաքային իշխանություններին է,  մասնագիտական հանրույթի՝ ճարտարապետների, շինարարների, մասնագիտական ՀԿ-ների հետ քննարկումներ են եղել։

««Երևանի գլխավոր ճարտարապետ» ինստիտուտի փոխարեն առաջարկում ենք ընդունել փոփոխություն, որի արդյունքում Երևանի քաղաքապետարանում կունենանք նոր տեղակալ, որը կզբաղվի այն խնդիրների լուծմամբ, որով զբաղվում էր Երևանի գլխավոր ճարտարապետը:

Երևանի ճարտարապետը, լինելով հայեցողական պաշտոն, զբաղվում էր ավելի շատ վարչական խնդիրների լուծումներով, այդ պարագայում իր դերակատարումը և իր մասնակցությունը որոշակի առումով իդենտիֆիկացվում էր իր մասնագիտական կամ ճարտարապետական մասնագիտական ճաշակի, ունակությունների, գիտելիքների հետ, ինչը որոշակի կոնֆլիկտ էր բերում կողմերի միջև: Առաջարկում ենք, որ այս խնդիրներով զբաղվի վարչական պաշտոնյան, ով իր իրավասությունների շրջանակում կարողանա համակարգել աշխատանքները»,- մանրամասնեց Վ. Տերտերյանը:

Նա նշեց, որ բոլոր համայնքներում, հատկապես Երևանում ճարտարապետական և քաղաքաշինական խնդիրները լուծվում են մասնագիտական կառույցների, խորհուրդների հետ աշխատանքային քննարկումների, փոխհամաձայնեցման արդյունքում:

«Մենք ուղղակի գլխավոր ճարտարապետի հայեցողական պաշտոնը փոխարինում ենք վարչական՝ համայնքի ղեկավարի տեղակալ պաշտոնով»,- ասաց նա։

Վ.Տերտերյանի խոսքում, այս ոլորտում պետք է լինի բազմակարծություն, քննադատություն, բանավեճ, բայց պրոցեսի կառավարումը պետք է իրականացնի վարչական սուբյեկտը, այսինքն քաղաքապետարանն՝ ի դեմս քաղաքապետի տեղակալի։

Օրենքի նախագծում նշված է. 

«Երևանի քաղաքապետի տեղակալի պաշտոնի ավելացումով Երեւանի քաղաքապետը փոխքաղաքապետի միջոցով հնարավորություն կունենա արդյունավետ կերպով համակարգել ճարտարապետաքաղաքաշինական ոլորտի միավորները, իսկ Երևանի ճարտարապետին վերապահված որոշ նեղ մասնագիտական գիտելիքներ և փորձարարություն պահանջող գործառույթներ քաղաքապետարանը կառուցվածքային փոփոխություններ կատարելու միջոցով կտեղափոխի անվանի, փորձառու և արդյունավետ ճարտարապետական պրակտիկա ունեցող ճարտարապետների կոլեգիալ որոշումների ընդունման դաշտ:

Նշված ոլորտում աշխատանքների արդյունավետության բարձրացման, ոլորտի բոլոր ստորաբաժանումների համակարգումը մեկ անձի կողմից իրականացվելու, ինչպես նաեւ ոլորտի զարգացման վերաբերյալ քաղաքական որոշումներ կայացնելու նպատակով՝ առաջարկվում է Երևան քաղաքի գլխավոր ճարտարապետի հաստիքը փոխարինել Երեւանի քաղաքապետի տեղակալի հաստիքով»։