Ձեր վստահելի աղբյուրը

«Գորիս» քրեակատարողական հիմնարկը երկու օր է չի ընդունում Գորիս համայնքի ղեկավարի տեղակալ Մենուա Հվոսեփյանին, ով ինքնակամ գնացել և ներկայացել է։

Panorama.am-ի հետ զրույցում Մ. Հովսեփյանի պաշտպան Արմեն Մելքոնյանն ասաց, որ ՔԿՀ-ից հայտնում են՝ դեռ չեն ստացել Վերաքննիչ քրեական դատարանի որոշումը։ 

Հիշեցնենք, որ Վերաքննիչ քրեական դատարանը, դատավոր Սևակ Համբարձումյանի նախագահությամբ,  նոյեմբերի 11-ին բավարարվել է Մենուա Հովսեփյանին 30 միլիոն դրամ գրավի դիմաց ազատ արձակելու որոշման դեմ դատախազության բողոքը և Հովսեփյանին կրկին կալանավորելու որոշում կայացրել։

«Հիմա Մենուա Հովսեփյանը գնացել է Սյունիքի մարզի առաջին ատյանի դատարան, որ դատարանի ցուցումները կատարի, որպեսզի վաղը չասեն՝ մի բան այն չես արել։

Մենք դռներ ենք ծեծում, որ մեզ կալանավորեն»,- ասաց Ա. Մելքոնյանը։

Պաշտպան այս ամենը կապում է այսօրվա քաղաքական նկրտումների և նոյեմբերի 14-ին Կապանում տեղի ունենալիք ՏԻՄ ընտրությունների հետ։

«Ուզում են ցույց տան, որ ամենակարողն ու ամենազորեղն են, ովքեր իշխանություններին հակառակվեն, այսօրվանն են արժանանալու»,- ասաց Ա. Մելքոնյանը։

Մ. Հովսեփյանի պաշտպանն ասաց, որ Վերաքննիչ քրեական դատարանի որոշումը ստանալուց հետո այն անպայման կբողոքարկեն։

Սյունիքի մարզի ընդհանուր իրավասության դատարանը, դատավոր Բորիս Բախշիյանի նախագահությամբ, հոկտեմբերի 14-ին Մենուա Հովսեփյանի և մյուսների գործով նախնական դատական նիստին քննարկել էր Հովսեփյանի խափանման միջոցի հարցը և որոշում կայացրել նրա նկատմամբ ընտրված խափանման միջոց կալանավորումը գրավով փոխարինելու մասին՝ գրավի չափ սահմանելով 30 մլն դրամը։ Դատախազությունը բողոքարկել էր դատարանի որոշումը։

Հիշեցնենք, որ օգոստոսի 16-ին ՀՀ ՔԿ-ն որոշումներ է կայացրել Գորիս համայնքի ղեկավարի պաշտոնակատար Իրինա Յոլյանին, համայնքապետարանի երկու աշխատակիցներին ՀՀ քրեական օրենսգրքի 179-րդ հոդվածի 3-րդ մասի 1-ին կետով, իսկ համայնքի ղեկավարի տեղակալ Մենուա Հովսեփյանին՝ ՀՀ քրեական օրենսգրքի 149.1-րդ հոդվածի 2-րդ մասի 1-ին և 2-րդ կետերով, 179-րդ հոդվածի 3-րդ մասի 1-ին և 179-րդ հոդվածի 2-րդ մասի 1-ին կետերով նախատեսված հանցավոր արարքներ կատարելու համար որպես մեղադրյալներ ներգրավելու մասին: Նրանք ձերբակալվել էին։  Բացի Մ. Հովսեփյանից, մյուս երեքին կալանավորելու մասին միջնորդությունները մերժվել էին։