Ձեր վստահելի աղբյուրը

Ռուսաստանի Զինված ուժերի ակադեմիայի ռազմական գիտնականները նոր համալիր են ստեղծում ծայրահեղ կարևոր ենթակառուցվածքներն անօդաչուների խմբակային հարձակումից պաշտպանելու համար: Այս մասին գրում է «ՌԻԱ ՆՈՎՈՍՏԻ» գործակալությունը:

Խոսքը գմբեթաձև էլեկտրական պատնեշի մասին է, որն ունակ է հետ մղել և ոչնչացնել անօդաչուները:

Գերատեսչության կայքում հրապարակված նկարագրության համաձայն՝ սարքը կազմված է կառավարվող էլեկտրականացված պարիսպից՝ երկու ցանցանման գմբեթի տեսքով, ռադիոէլեկտրոնային հայտնաբերման միջոցներից, օպերատորի ավտոմատացված աշխատատեղից և էլեկտրական էներգիայի փոխակերպման սարքավորումից, ինչպես նաև սնուցման աղբյուրից և տեսադիտարկման համակարգից:

Համալիրը նախատեսված է ծայրահեղ կարևոր կառույցների, այդ թվում՝ ատոմային էլեկտրակայանի և նավթամբարների պաշտպանության համար: Պարիսպը համալրված է ԱԹՍ-ներ հայտնաբերելու ռադիոէլեկտրոնային համակագով, որը թույլ է տալիս որոշել անօդաչու թռչող սարքերի քանակը, դրանց տեղաշարժման պարամետրերը, որոնց հիման վրա իրականացվելու է պաշտպանիչ էլեկտրական պարսպի գործունեությունը:

Փաստաթղթի համաձայն՝ նորույթի նպատակահարմարությունը դրա խնայողականությունն է շահագործման ժամանակ, քանի որ անօդաչուների խմբակային հարձակման պարագայում ավանդական պաշտպանական համալիրների կիրառումը, որոնք նախատեսում են անօդաչուի խոցումը զինամթերքով, ծախսատար է, և այդ թիրախներին խոցելու հավանականությունը նվազում է: