«Հրապարակ». ՏԻՄ-երի տվայտանքները շարունակվում են

Օրվա մամուլ 09:59 12/11/2021 Հայաստան

«Հրապարակ» թերթը գրում է. «Թեպետ Տաթևում երեկ «Ապրելու երկիր» և «Շանթ դաշինք» կուսակցությունների միջև կոալիցիոն հուշագիր ստորագրվեց, որով, ըստ էության, պարզ դարձավ, որ համայնքի ավագանու 2 ուժերն այլևս մեծամասնություն են կազմում, սակայն իշխող ՔՊ-ն շարունակում է զոռբայությունը և փորձում զավթել համայնքապետի աթոռը։ Հիշեցնենք, որ Տաթևում ուժերից և ոչ մեկը բացարձակ մեծամասնություն չունի, սակայն շնորհիվ կոալիցիայի, ՔՊ-ն այլևս ընդդիմություն է։ Օրենքով` համայնքի ղեկավարի ժամանակավոր պաշտոնակատարն է ավագանու առաջին նիստ նշանակում, սակայն ՔՊ գործող համայնքապետ, համայնքապետի թեկնածուն դեռ չի շտապում:

Չնայած արդեն փոշմանել են և որոշել են վերցնել մանդատները, օրեր առաջ հակառակն էին հայտարարել։ «Շանթ դաշինք» կուսակցության հիմնադիր Շահեն Հարությունյանը երեկ մեզ տեղեկացրեց, որ եթե մինչև եկող շաբաթ նիստ չնշանակեն, ապա որպես ավագանիում մեծամասնություն ունեցող ուժ՝ իրենք են դիմելու նիստ հրավիրելու պահանջով։ Ի դեպ, ի տարբերություն Տաթևի, «Ապրելու երկիր» կուսակցությունը Մեղրիում անհարմար դրության մեջ հայտնվեց:

Մեզ ասացին, որ չնայած կուսակցության համահիմնադիր Մանե Թանդիլյանը նախապես ընդունել է Արամ Սարգսյանի առաջարկը, և պատրաստ են եղել «Հանրապետություն» կուսակցության թեկնածուի` Բագրատ Զաքարյանի հետ կոալիցիա կազմել ու իրենց 2 մանդատով քաղաքապետի օգտին քվեարկել, սակայն «Ապրելու երկրի» ցուցակի երկրորդ համարն ասել է, որ միայն ՔՊ թեկնածուի օգտին է ինքը քվեարկելու, և համագործակցությունը տապալվել է: Զաքարյանն էլ կոալիցիա է կազմել Սամվել Բաբայանի ցուցակով անցած ավագանու անդամների հետ»։

Մանրամասները թերթի այսօրվա համարում:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: