Սերգեյ Մինասյան. Ադրբեջանի սանձազերծած պատերազմը հանգեցրեց իսկական հումանիտար աղետի, որի հետևանքները դեռևս լուծված չեն
Նոյեմբերի 9-ին DefenseRomania մասնագիտական ռազմաքաղաքական գործակալությունը հրապարակել է Ռումինիայում ՀՀ դեսպան Սերգեյ Մինասյանի հարցազրույցը՝ Արցախի դեմ Ադրբեջանի սանձազերծած պատերազմի հրադադարի եռակողմ հայտարարության մեկ տարվա կապակցությամբ։ Հոդվածը հրապարակվել է նաև մեծաքանակ այցելուներ ունեցող DCNews լրատվական գործակալության կողմից:
Բուխարեստում Հայաստանի դեսպանը խոսում է Լեռնային Ղարաբաղում տիրող իրավիճակի մասին և նշում, որ անցյալ տարվա հակամարտության ընթացքում լրջորեն խախտվել են մարդասիրական և ռազմական իրավունքի դրույթները։
«Երևանը դատապարտում է «իսկական հումանիտար աղետը» և կոչ է անում ԵԽ և միջազգային կառույցներին հետաքննություն անցկացնել տարածաշրջանի ծայրահեղ ծանր իրավիճակի վերաբերյալ։ Ադրբեջանի իշխանությունները ոչ միայն չկատարեցին իրենց պարտավորությունները, այլև անցյալ տարվա աշնանը լրջորեն խախտեցին հումանիտար և ռազմական իրավունքը, ինչը հանգեցրեց իսկական հումանիտար աղետի, որի հետևանքները դեռևս լուծված չեն և ինչը, անխոս, պետք է ուսումնասիրության առարկա լինի ԵԽ և այլ միջազգային կառույցների համար», - ասել է հայաստանցի դիվանգետը։
Նա ընդգծել է, որ Ադրբեջանը երբեք շահագրգռված չի եղել հակամարտությունը կարգավորել խաղաղ ճանապարհով:
«Արցախի դեմ ադրբեջանա-թուրքական ագրեսիայից հետո Արցախի հայերը բախվել են բազմաթիվ հումանիտար խնդիրների: Ավելի քան 40 հզր մարդ մնացել է առանց տան ու գույքի, ավերվել են կենսական նշանակության ենթակառուցվածքներ, այդ թվում՝ դպրոցներ և հիվանդանոցներ և այդ իսկ պատճառով Հայաստանի Հանրապետությունը կարևորում է միջազգային մարդասիրական կազմակերպությունների ու այլ մարմինների ազատ մուտքն Արցախ, ինչը չափազանց կարևոր է հետպատերազմյան հումանիտար ճգնաժամի համապարփակ և արդյունավետ կարգավորման համատեքստում։
Կատարվածից մեկ տարի անց անգամ Ադրբեջանը դեռ գերության մեջ է պահում հայ ռազմագերիներին՝ զինվորականներին և քաղաքացիական անձանց, լրջորեն խախտելով ինչպես նոյեմբերի 9-ի եռակողմ համաձայնագրի ստորագրմամբ ստանձնած պարտավորությունները, այնպես էլ միջազգային մարդասիրական իրավունքի նորմերը»,-ասել է նա։
Սերգեյ Մինասյանն ընդգծել է, որ Հայաստանը մշտապես հանդես է գալու Արցախի ժողովրդի իրավունքների վերականգնման և պաշտպանության համար և ջանք չի խնայելու ԼՂ հիմնախնդրի արդար, համապարփակ ու տևական լուծման հասնելու համար՝ երաշխավորելով Արցախում ապրող հայության իրավունքը՝ ապրել արժանավայել և ապահով իրենց Հայրենիքում։
«Միանգամայն պարզ է նաև, որ այս հարցի խաղաղ կարգավորումն այլընտրանք չունի և ԵԱՀԿ Մինսկի խմբի համանախագահների սկզբունքների և որոշումների հիման վրա Լեռնային Ղարաբաղի կարգավիճակի հստակեցմանը զուգահեռ հրամայական է խաղաղ միջավայրի ստեղծումը և տարածաշրջանում կապի բոլոր միջոցների ապաշրջափակումն ու պայմանների ստեղծումը լիարժեք ժողովրդավարացման, մարդու իրավունքների պաշտպանության և հումանիտար խնդիրների լուծման համար։
Սյս համատեքստում կարևոր է ռումինական դիվանագիտության նախաձեռնությունը, որին իրենց աջակցությունն են հայտնել եվրոպական 10 պետություններ և ԵՄ արտաքին գործերի ու անվտանգության քաղաքականության հարցերով բարձր ներկայացուցիչ Ժոզեպ Բորելը։ Նախաձեռնության շրջանակներում այս տարվա ամռանը Ավստրիայի և Լիտվայի իր գործընկերների հետ միասին կայացավ Ռումինիայի արտաքին գործերի նախարար Բոգդան Աուրեսկուի այցը տարածաշրջան, որի ընթացքում նրանք հանդիպումներ ունեցան Հարավային Կովկասի պետությունների ղեկավարների հետ։ Հուսով ենք, որ ռումինական դիվանագիտության նախաձեռնությունը կնպաստի, առաջին հերթին, արդի և հրատապ հարցերի լուծմանը, ինչպիսիք են հումանիտար խնդիրները, բայց նաև կստեղծի միջավայր, որը կնպաստի կայուն խաղաղության հաստատմանը՝ հարգելով ժողովրդավարության, օրենքի գերակայության և մարդու իրավունքների պաշտպանության ոլորտում եվրոպական չափանիշները»,-նշել է նա։
Լրահոս
Տեսանյութեր
Ժողովուրդը լրիվ անտեսված է, ամեն ինչ ի շահ իշխանության է արվում. Երևանցիները՝ տրանսպորտի մասին
