Ձեր վստահելի աղբյուրը

«Այս պահի դրությամբ ճշտումներ են իրականացվում Շուշիի մոտակայքում հայկական և ադրբեջանական կողմերի միջև տեղի ունեցած միջադեպի վերաբերյալ»,- Panorama.am-ի հետ զրույցում հայտնեցին Արցախի ԱԱԾ-ից։

ԱԱԾ-ից ասացին, այս պահին եղած տեղեկությունները հստակ չեն, դրանք ամեն րոպե կարող են փոփոխվել։

Միջադեպի հետևանքով զոհերի վիրավորների մասին հարցին ԱԱԾ-ից նույն պատասխանը տվեցին՝  չենք կարող տեղեկեություններ տալ։

Տարածված լուրերի համաձայն, միջադեպն օրեր առաջ Շուշիում ադրբեջանցու կողմից արցախցի երիտասարդի սպանության հետ կապ ունի։ Սպանված 22-ամյա երիտասարդի հարազատներից մեկը փորձել է վրեժխնդիր լինել ադրբեջանցիներից։

Արցախի ՆԳՆ տարածած հաղորդագրության համաձայն, հայկական և ադրբեջանական կողմերի միջև տեղի ունեցած միջադեպի պատճառով, այս պահին Ստեփանակերտ-Բերձոր միջպետական ճանապարհը երկկողմանի փակ է:

Արցախի Հանրապետության իրավապահ մարմինները՝ ռուսական խաղաղապահ զորակազմի հետ մեկտեղ, հակառակորդ կողմի հետ վարում են բանակցություններ՝ երթևեկն անխափան կազմակերպելու ուղղությամբ:

Հիշեցնենք, որ նոյեմբերի 8-ին, ժամը 15.00-ի սահմաններում, Շուշի քաղաքի մերձակա խաչմերուկում ադրբեջանցի զինծառայողի կողմից կրակոցներ են արձակվել ջրատար խողովակների վերանորոգման աշխատանքներ իրականացնող՝ «Ջրմուղ կոյուղի» ՓԲԸ  աշխատակիցների վրա: Կրակոցների հետևանքով մեկը տեղում մահացել է, իսկ երեք հոգի հրազենային վնասվածքներով տեղափոխվել են հանրապետական բժշկական կենտրոն: Վերջիններս վիրավորումը ստացել են կրծքավանդակի և պարանոցի հատվածում։