Ձեր վստահելի աղբյուրը

«Խորհրդարանի աշխատանքից տեսնում ենք, որ խորհրդարանի միջոցով իշխանությունը փոխելը հիմա անհույս գործ է, պետք է մտածվեն այլ մեխանիզմներ, այլ կառույցներ, այլ միջոցառումներ, որի շնորհիվ իշխանությունը կփոխվի»,- «Պատերազմ և կապիտուլյացիա. մեկ տարի անց» թեմայով քննարկմանն ասաց «Մեդիա պաշտպան« նախաձեռնության ղեկավար Աղասի Ենոքյանը:

Նա հիշեցրեց, որ ընտրությունները եղան ոչ թե ընդդիմության հանրահավաքների պիկին, այլ երբ արդեն անցել էր այդ պիկը, ըստ էության, ընդդիմությունից չկար իշխանությունը վերցնելու վտանգ, և Փաշինյանը գնաց ընտրությունների:

Ա. Ենոքյանի կարծիքով, այնուամենայնիվ, Աժ արտահերթ ընտրությունները դրսից թելադրված քայլ էր:

«Մինչև հիմա կապիտուլյացիայի վերաբերյալ որևէ փաստաթուղթ գոյություն չունի: Տարբեր հայտարարությունները՝ նոյեմբերի 9-ի, հունվարյան, միջազգային փաստաթղթեր չեն և այն, ինչ կատարվում է՝ քայլ առ քայլ տարածքներ վերցնելը, ադրբեջանական զորքերի մուտքը Հայաստան, ռուսական զորքերի մուտքը Հայաստան, մի հայտարարության վրա հիմնված քայլեր են, հայտարարություն, որն իրավական արժեք, ուժ չունի:

Իմ կարծիքով, ընտրությունների ամբողջ իմաստը ստանալ ավելի լեգիտիմ, ներկայացուցչական, նաև փողոցային ընդդիմությունը ներկայացված խորհրդարան, որը կգնա այսպիսի փաստաթղթի հաստատմանը»,- ասաց Ա. Ենոքյանը:

Նրա խոսքով, հիմա որոշակի ճնշումներ կան Փաշինյանի վրա, որպեսզի ստորագրի փաստաթուղթը, որից հետո կգնա խորհրդարանական գործընթացները:

«Կարծես թե դիմադրում է՝ շատ լավ հասկանալով, որ  այդ փաստաթղթից հետո ինքը շատ լուրջ խնդիրներ է ունենալու, դրանից հետո այլևս անելիք չի ունենալու, հրաժարականի հարցն ավելի սուր է լինելու»,- ասաց Ա. Ենոքյանը:

Հիմա, ըստ նրա, ականատես են լինելու, թե  կապիտուլյացիոն փաստաթուղթն ինչ վայրիվերումներով է հասնելու իր իրավական, տրամաբանական ավարատին, բայց այդ ընթացքում տեսնում են սողացող ագրեսիա՝ չստորագրված, չհայտարարված փաստաթղթի համաձայն տարածքներ է հանձնվում: