Ձեր վստահելի աղբյուրը

«Այսօր մենք մի իրավիճակի առաջ ենք կանգնած, որ բացահայտ ու շատ ակնառու կերպով քաղաքական մեծամասնությունը, ստորադասելով սեփական ներխմբային շահերը, ուղղակի արհամարհում է սահմանադրական կարգավորումները»,-այսօր ԱԺ-ում հրավիրված ասուլիսում հայտնեց «Հայաստան» խմբակցության քարտուղար Արծվիկ Մինասյանը:

Նա տեղեկացրեց, որ իշխանությունների նման ապօրինի վարքագծի վերաբերյալ արդեն  խորհրդարանական ընդդիմությունը նաև դիմում է ներկայացրել ՍԴ:

«Այսօրվա  բողոքը մեր կողմից օգտագործվում է որպես նախազգուշական քայլ, որը որևէ ձևով չի նշանակում, որ մենք խուսափելու ենք  բոլոր տեսակի հարցերի քննարկումներից»,-հայտնեց պատգամավորը և տեղեկացրեց, որ այսօր ԱԺ նիստի օրակարգում ընդդիմության պահանջով երեք հարց էր ներառված:

Մինասյանի խոսքով՝ «Վարչական դատավարության մասին» օրենքում փոփոխություններով Արամ Վարդևանյանը առաջարկում է մինչև 500 հազար տուգանքի դեպքում արգելել վարչական մարմինների՝ վերադասության մասով բողոք բերելը, քանի որ հազարավոր քաղաքացիներ այսօր առաջին ատյաններում հաղթել են սխալ վարչական տուգանքի դեպքերով, բայց վերադաս բողոքները նրանց գցել է ծանր վիճակի:

«Հայաստան» խմբակցության քարտուղարը տեղեկացրեց, որ օրակարգում է ընդգրկված նաև գերիների և անհայտ կորածների հարցը, որը զեկուցելու էր Աննա Գրիգորյանը, իսկ երրորդ հարցապնդումը վերաբերում էր հետպատերազմյան շրջանում հումանիտար սխեմաներին:

Նրա խոսքով՝ ըստ «ԱԺ կանոնակարգ» օրենքի՝ այդ հարցերն ավտոմատ տեղափոխվում են և իշխող մեծամասնությունը չի կարող այդ հարցերը քննարկման առարկա դարձնի, քանի որ եթե հիմանկան զեկուցողները բացակայում են, ապա հարցի քննարկումը ինքնաշխատ եղանակով տեղափոխվում է:

Մինասյանն ասաց, որ ընդդիմությունը հայտարարել է, որ բոլոր գործիքակազմերն օգտագործելու են և աստիճանաբար դրանք իրականացնելու են:

Նա տեղեկացրեց, որ արտահերթ նիստ գումարելու համար 28 պատգամավորի ստորագրություն էր պետք և նախորդ օրը քննարկումների ժամանակ դեռ ազատության մեջ էր «Հայաստան» խմբակցության պատգամավոր Արթուր Սարգսյանը:

«Սիսիանի պատգամավորը, որի հատվածի վրա այսօր ադրբեջանական զորքը շարված է, և արտահերթ նիստ հրավիրելու փաստաթուղթը ստորագրելուց հետո ստանում ենք տեղեկություն, որ Վերաքննիչ դատարանը՝ տխրահռչակ Արմեն Դանիելյանի գլխավորությամբ որոշել է փոխել որոշումը և կալանավորել Արթուր Սարգսյանին, ձեր կարծիքով այս իրավիճակում ընդդիմությունը պետք է մասնակցե՞ր այս ապօրինությանը»,-ասաց ընդդիմադիր պատգամավորը:

Շեշտելով, որ այսօրվա նախազգուշական բոյկոտը մշտական գործելաոճ չի դառնալու՝  Մինասյանը հայտարարեց. «Որևէ բան մեզ չի կաշկանդում մանդատները դնելու հարցում, մենք ասել ենք, որ մանդատներն օգտագործելու ենք բացահայտելու այս իշխանությունների ապօրինությունները, ազգադավ լինելը, իրականացնելու ենք բոլոր գործողությունները, որոնց հնարավորությունը տալիս է մանդատը, այդ թվում՝ նաև ՍԴ դիմելու միջոցը»:

Նրա խոսքով մանդատների դնելու հարցն ընդդիմության օրակարգից դուրս չի եկել, բայց այն կլինի այն դեպքում, երբ կտեսնեն, որ դրանով հասնում են վերջնանպատակին՝ կփոխեն կապիտուլացված իշխանությանը՝  վերականգնելով ազգային իշխանությանը և սահմանադրական կարգը:

Նա հորդորեց  համոզված լինել, որ «Հայաստան» խմբակցության 29 պատգամավորները որևէ ձևով կաշկանդված չեն մանդատի կամ կարգավիճակի առկայությամբ և տեղեկացրեց, որ առաջիկայում նոր հայտարարությամբ են հանդես գալու, բայց դրա մասին չհայտնեց, քանի որ սպասում են գործողության: