Ձեր վստահելի աղբյուրը

ՄԱԿ-ը կոչ է անում Հայաստանին և Ադրբեջանին հարցերը լուծել խաղաղ ճանապարհով երկխոսության միջոցով և զսպվածություն ցուցաբերելով։  ՏԱՍՍ-ի հաղորդմամբ, այս մասին ասել է ՄԱԿ-ի գլխավոր քարտուղարի պաշտոնական ներկայացուցչի տեղակալ Ֆարհան Խակը։

«Մենք անհանգստությամբ հետևում ենք վերջին բռնությունների մասին հաղորդագրություններին: Մենք պետք է ստուգենք այդ հաղորդումները։ Կոչ ենք անում բոլոր կողմերին զսպվածություն ցուցաբերել, գործել 2020 թ. նոյեմբերից 9-ի և 2021 թ. հունվարի 11-ի եռակողմ հայտարարություններին համապատասխան (Ռուսաստան, Հայաստան և Ադրբեջան), լուծել բոլոր համապատասխան մտահոգությունները խաղաղ ճանապարհով երկխոսության միջոցով: Մենք ցանկանում ենք խուսափել էսկալացիայի վերադարձից»,- ասել է նա։

Հիշեցնենք, որ նոյեմբերի 16-ին, ժամը 13։00-ի սահմաններում, Ադրբեջանի ԶՈՒ ստորաբաժանումները հարձակում են գործել սահմանի տվյալ ուղղությամբ տեղակայված հայկական դիրքերի վրա։ Հակառակորդը կիրառել է նաև հրետանային միջոցներ, զրահատեխնիկա և տարբեր տրամաչափի հրաձգային զինատեսակներ։

Հայկական կողմի պատասխան գործողությունների արդյունքում հակառակորդն ունի կենդանի ուժի մեծաթիվ կորուստ, մի քանի միավոր զինտեխնիկա ոչնչացվել կամ շարքից դուրս է բերվել։ Հայկական կողմը նույնպես կորուստներ ունի։ Այս պահին ճշտված տվյալներ կան մեկ զոհի մասին՝ 1991թ. ծնված, պայմանագրային զինծառայող, շարքային Մերուժան Արթուրի Հարությունյան։ Վիրավորների թիվը նույնպես ճշտվում է։ Եվս 12 զինծառայող գերեվարվել է։

Ռուսական կողմի միջնորդությամբ ձեռք բերված պայմանավորվածության համաձայն՝ ժամը 18։30-ից ՀՀ արևելյան սահմանագոտում կրակը դադարեցվել է, իրադրությունը հարաբերականորեն կայունացել է։