Ձեր վստահելի աղբյուրը

«Կարծում եմ, որ իշխանությունը մամուլ չի կարդում, որ չհասկանա իր ապիկարությունը և հասարակության ռեակցիաները։ Բայց եթե նրանք կարդային մամուլ, կիմանային, որ ես իմ գործընկեր պատգամավորների հետ հիմա գտնվում եմ Սյունիքում` տեղում ծանոթանալու իրավիճակին»,-այս մասին NEWS.am-ին ասել է ԱԺ «Հայաստան» խմբակցության պատգամավոր Վահե Հակոբյանը՝ մեկնաբանելով  ՔՊ-ական պատգամավոր Բաբկան Թունյանի հայտարարութունը։

Վերջինը, որ ԱԺ Տնտեսական հարցերով մշտական հանձնաժողովի փոխնախագահն է, այսօր  հանձնաժողովի նիստի ընթացքում հետաքրքրվել էր, թե որտեղ է հանձնաժողովի նախագահ Վահե Հակոբյանը։  Իմանալով, որ Հակոբյանը Սյունիքում է՝  Թունյանը դժգոհություն է հայտնել, ապա հարցրել,  ո՞վ կարող է պատասխանել՝ ինչու Հակոբյանը չի վարում այս նիստը։ Թունյանը հորդորել է ավելի գործընկերային գտնվել՝ շեշտելով, որ եթե ինքն էլ որևէ շտապ գործի պատճառով բաց թողներ նիստը, այն չէր կայանա։

Ի պատասխան Վահե Հակոբյանը նշել է, որ Սյունիք է մեկնել,  քանի որ իշխանության վերահսկման տակ գտնվող տեղեկատվական հոսքերից հստակ պատկերացում չի կազմվում, թե ինչ է իրականում կատարվել այնտեղ:

«Սյունիքից մարդիկ մեզ տեղեկատվություն են տրամադրում, որը հակասում է իշխանության տրամադրած տեղեկատվությանը։ Այդ պատճառով ես ստիպված եմ գտնվել Սյունիքում։

Ինչ վերաբերում է Բաբկեն Թունյանին, ցավում եմ, որ այս պահին «Հանրային ծառայությունները կարգավորող մարմնի մասին» օրենքում փոփոխություններ ու լրացումներ կատարելու մասին նախագծի քննարկումն ավելի է կարևորվում այն պարագայում, երբ ունենք անվտանգային լրջագույն խնդիրներ, ադրբեջանական զինված ուժերը բացահայտ ագրեսիա են դրսևորում մեր երկրի սուվերեն տարածքում և երեկ, փաստացի, Սյունիքում տեղի էին ունենում ռազմական գործողություններ։ Իսկ իշխանությունը, փոխարեն հրատապ  կերպով զբաղվի մեր երկրի ու ժողովրդի անվտանգության ապահովմամբ, այս պահին երկրորդական կարևորության նախագծեր է բերում Տնտեսական հարցերի հանձնաժողով և 24-ժամյա հրատապ ռեժիմով փորձում անցկացնել ԱԺ լիագումար նիստեր:

Կրկնակի ցավում եմ, որ իշխանությունը այդպես էլ չգիտակցեց իր առաջնահերթությունների ու անելիքների հաջորդականությունը»,-ասել է «Վերածնվող Հայաստան» կուսակցության նախագահը։