Ձեր վստահելի աղբյուրը

Հայաստանի սահմանի արևելյան գոտում Ադրբեջանի զինված ուժերի հարձակման հետևանքով հայկական կողմի կրած կորուստների մասին պետական մարմինները շարունակում են  հրապարակել տվյալներ, որոնք միմյանցից տարբերվում են։

Երեկ ՔՊ-ական պատգամավոր Էդուարդ Աղաջանյանը «Ազատության» եթերում հայտարարել էր 15 հայ զինծառայողի զոհվելու մասին։ ՊՆ-ն այսօր հայտարարեց՝ կա հաստատված մեկ զոհ։

«Հայկական կողմն ունի 1 զոհված և 13 գերեվարված զինծառայող։ Եվս 24 զինծառայողի հետ կապը կորել է մարտական գործողությունների ընթացքում և նրանց ճակատագիրն այս պահին անհայտ է։ Զինծառայողների հայտնաբերման ուղղությամբ ընթանում են ինտենսիվ աշխատանքներ։ Հակառակորդի վերահսկողության տակ է անցել երկու մարտական հենակետ»,-ասված էր պաշտպանության նախարարության հաղորդագրության մեջ։

Քիչ առաջ ԱԳ նախարարությունից գերեվարվածների մեկ այլ թիվ հրապարակեցին։

«Ուզում եմ տեղեկացնել, որ այս պահին հայկական կողմն ունի հաստատված 1 զոհ, 12 գերեվարված հայ զինծառայող, և ևս 24 հայ զինծառայողի ճակատագիրն այս պահին անհայտ է։ Ռուսական կողմի մասնակցությամբ ընթանում են որոնողական աշխատանքներ»,- ասել է Արարատ Միրզոյանը։

Վիրավորների մասին ընդհանրապես տվյալներ չեն հրապարակվում։

Համացանցում զոհերի, գերեվարվածների մասին տարբեր թվեր են շրջանառվում, բազմաթիվ օգտատերեր նշում են, որ նախարարության հրապարակած տվյալները  չեն համապատասխանում իրականությանը։