Ձեր վստահելի աղբյուրը

«Արդեն երկու օր է անցել սահմանային դեպքերից և այսօր կա միայն հակասական պաշտոնական տեղեկատվություն, մենք չգիտենք, թե քանի գերի, քանի նահատակված զինվոր ունենք»,- «Հայելի» ակումբում հայտնեց ՀՀԿ Գերագույն մարմնի անդամ Էդուարդ Շարմազանովը և նկատեց, որ Պաշտպանության նախարարարությունը մի բան է ասում, իշխանական պատգամավորները մեկ այլ բան, իսկ Նիկոլ Փաշինյանն ընդհանրապես բան չի ասում:

Բանախոսը նկատեց, որ այս ժամանակահատվածում ոչ թե հայ գերիների տունդարձի հավանականությունն է մեծացել, այլ արդեն կան նոր գերեվարվածներ:

«Եթե 44-օրյա պատերազմում մեղավոր էին նախկինները, հիմա աստիճանաբար մեղավոր են կարգվում գերիները»,- ասաց Շարմազանովը և հիշեց Նիկոլ Փաշինյանի՝ նախկինում արած այն խոսքը, թե խաղաղության դարաշրջան է բացվել և ոչինչ չի լինի, եթե հայ գերիները 1-2 ամիս էլ մնան Բաքվում:

Ըստ Շարմազանովի՝ Փաշինյանի բառերում արդեն գերիների վերաբերյալ «եղբայրներ» եզրույթը չկա, կան գերիներ և պետք է հետաքննեն՝ տեսնեն, թե ինչ հանգամանքներում են գերի ընկել:

«Երեկ Նիկոլ Փաշինյան անուն-ազգանունով անձն, իսկ իրականում կապիտուլյացիայի սիմվոլը ՀՀ ԱԺ-ում դավաճանության ինքնախոստովանության ցուցմունք է տվել»,- հայտարարեց բանախոսը՝ համադրելով նախկինում Փաշինյանի արած Սև լճի համար պատերազմ չսկսելու և նախորդ օրն ԱԺ-ում չկրակելու հրաման տվողին դավաճան որակելու երկու հակասական հայտարարությունները:

Հիշելով, որ 44-օրյա պատերազմից հետո բանավոր հրամանով զորքերը զբաղեցրած դիրքերից հետ քաշելը Փաշինյանը մեկնաբանում էր նրանով, որ հակառակ դեպքում պատերազմ էր լինելու՝ Շարմազանովը նկատեց, որ հիմա էլ է պատերազմ, հետևաբար՝ «նիկոլական խաղաղասիրական դարաշրջանը փուչիկ էր» և նա ոչ թե խաղաղություն է բերում, այլ նոր պատերազմներ, զոհեր և գերեվարվածներ:

«Տեղի է ունենում հայրենիքի հանձնման երկրորդ փուլը, առաջինը՝ պատերազմով Արցախի հանձնումն էր, հիմա էլ տեղի է ունենում Սյունիքի միջանցքի տրամադրում, որ հետո ասի՝ ես ինչ անեմ, լավ չէին կռվում, գերի էին ընկնում»,- ասաց Էդուրադ Շարմազանովը:

Նա համոզմունք հայտնեց, որ նախորդ օրը ԱԺ-ում քաղաքական մեծամասնության կրկեսային պահվածքը Նիկոլ Փաշինյանի ցուցումով է եղել :

«Այս կապիտուլյանտները մի ձեռքով օգնություն են աղերսում ՌԴ-ից, մյուս ձեռքով պառլամենտում քաղաքական մեծամասնության ներկայացուցիչները մատ են թափ տալիս Ռուսաստանի վրա»,- շեշտեց Շարմազանովը՝ հիշեցնելով, որ պատգամավորները Ռուսաստանին սպառնում էին Հայաստանին չօգնելու դեպքում նոր դաշնակիցներ ձեռք բերել, և հավելեց. «Տարածաշրջանում երկու բանակ կա՝ ռուսական և թուրքական, այսինքն՝ շանտաժ եք անում, որ Ռուսաստանից անցնեք Թուրքիայի գիրկն ընկնե՞ք»:

Էդուարդ Շարմազանովը համոզմունք հայտնեց, որ ՀՀ իշխանությունները ՌԴ-ին դիմելու իմիտացիա են արել և բորբոքել հակառուսական տրամադրություններ:

Ըստ ՀՀԿ Գերագույն մարմնի անդամի՝ Նիկոլ Փաշինյանը միջանցքի խոստում է տվել և փորձում է հետ կանգնել իր խոստումներից, հիմա էլ մեղքը գցում է արտաքին գործընկերների վրա: