Ձեր վստահելի աղբյուրը

ԱԺ նիստում օդանավակայանի տաքսի ծառայությունների գործունեությանն առնչվող օրենսդրական կարգավորումների նախագիծը քննարկելիս՝ ԱԺ տնտեսական հարցերի մշտական հանձնաժողովի փոխնախագահ Բաբկեն Թունյանը դժգոհություն հայտնեց, որ ընդդիմադիր պատգամավորնեը չեն մասնակցում նիստերին: Նա նշեց, որ նախագծի հարակից զեկուցողն ընդդիմադիր գործընկեր Հռիփսիմե Ստամբուլյանն է:

«Բայց, ինչպես  տեսնում եք, մեր գործընկերները բոյկոտել են ընդհանուր նստաշրջանը, 2-3  նիստերին չեն մասնակցում: Մենք այս ընթացքում ունեցել ենք բյուջեի քննարկում, նախագծերի քննարկումներ, հանձնաժողովի արտահերթ  նիստ: Ուզում եմ ասել՝ այս վարքագիծն անթույլատրելի է: Ես հասկանում եմ քաղաքական բոյկետի իմաստը, բայց կոնկրետ հանձնաժողովներում անթույլատրելի է հանձնաժողովի աշխատանքները ձախողման տանելը»,-ասաց իշխանական պատգամավորը:

Բաբկեն Թունյանը կոչ արեց ընդդիմության վերանայել այդ մոտեցումները, այլապես դա կդիտվի աշխատանքային պարտականությունների չկատարում՝ իր հնարավոր հետևանքներով հանդերձ:

Հիշեցնենք, որ ԱԺ նիստերը նոյեմբերի 16-ից բոյկոտել են ընդդիմադիր «Հայաստան» և «Պատիվ ունեմ» խմբակցությունները, նրանք իրենց դժգոհություն էին հայտնել նիստերի օրակարգում ընդգրկված հարցերից, նշել, որ իշխանությունը տարբեր ոլորտներին վերաբերող տարբեր հարցեր է ընդգրկել, բայց ոչ անվտանգությանը վերաբերող հարցեր: