Ձեր վստահելի աղբյուրը

«Մայր Աթոռը խնդրում է, որ հունվարի 5-ը և 7-ը ևս համարվի ոչ աշխատանքային և այդ հարցը քննարկվել է, թե թիմի ներսում, թե կուսակցության հետ միասին»,-կառավարության ճեպազրույցների սրահում հայտնեց Էկոնոմիկայի նախարար Վահան Քերոբյանը և հավելեց. «Ընդհանուր առմամբ, եկել ենք այն եզրակացության, որ եթե ընդառաջենք Մայր Աթոռի առաջարկին, ապա ռեֆորմն ընդհանրապես իր իմաստը կորցնում է»

Նախարարը շեշտեց, որ այդ իմաստով կառավարությունն անընդունելի է համարել առաջարկը:

«Մենք Մայր Աթոռին շատ մանրամասն հիմնավորումներ ենք տվել, թե ինպես կփոխվի տնտեսության կառուցվածքը և կամ տնտեսության աշխատանքը հունվար ամսին և ըստ էության այն ամենաքիչն է, որ մենք ակնկալում ենք այս փոփոխության արդյունքում»,-ներկայացնելով մերժման հիմքերն՝ ասաց Քերոբյանը:

Լրագրողի դիտարկմանը, թե կառավարությունը ընդառաջել էր և հունվարի 2-ը  դարձրել էր ոչ աշատանքային, ի՞նչն էր խանգարում, որ 2-ի փոխարեն հունվարի 5-ը դարձնեին ոչ աշխատանքային:

Էկոնոմիկայի նախարարը պատասխանեց, որ տաբեր առաջարկներ են եղել, բայց ընտրվել է միայն հունվարի 2-ը ոչ աշխատանքային օր համարելու տարբերակը և պնդեց, որ օրենքն արդեն երկրորդ ընթերցմամբ քննարկվել է ու կընդունվի

«Ես չեմ կարծում, որ հակասահմանադրական բան կա այս որոշման մեջ և իմանալով նաև նախագահին և իր տրամադրվածությունը աշխատանքի նկատմամբ, ունեմ բավարար չափով վստահություն, որ նա օրենքն կստորագրի հնարավորինս արագ»,-ասաց Վահան Քերոբյանը՝ պատասխանելով հարցին, թե իշխանությունները մտավախություն չունե՞ն, որ նախագահ Արմեն Սարգսյանը չի ստորագրի այն:

Լրագրողի դիտարկմանը, թե նախարարի վստահությունն արդյո՞ք գալիս է նրանից, որ իշխանությունն ինչ օրենք ուղարկում է՝ նախագահը ստորագրում է, Քերոբյանն առաջարկեց հարգանքով խոսել նախագահի պետական ինստիտուտի մասին:

«Խնդրում եմ՝ նման անհարգի և անհարկի արտահատություններ չանել, ես ձեզ առաջարկում եմ մնալ լրջության սահմաններում»,-հորդորեց Էկոնոմիկայի նախարարը: