Ձեր վստահելի աղբյուրը

«Հայաստանի Հանրապետությունը պարտավոր է պաշտպանել իր քաղաքացիների անվտանգությունը, երբ  Նիկոլ Փաշինյանը ԱԺ բարձր ամբիոնից խոսում է այն մարդկանց մասին, որոնք գտնվում են անազատության մեջ, գերեվարված վիճակում, նրա առաջին խնդիրն օր առաջ նրանց հայրենիք վերադարձնելն է»,- ԱԺ ճեպազրույցների ժամանակ ասաց «Հայաստան» խմբակցության քարտուղար Արծվիկ Մինասյանը:

Անդրադանալով գերիների նկատմամբ քննություն վարելու Փաշինյանի հատարարությանը՝ Մինսայանը նկատեց, որ վերջինս և իշխանության շատ անդամներ ոչ միայն չեն տիրապետում օրենսդրությանը, այլ փորձում են կիսատ-պռատ լսածն օգտագործել  իրենց PR-ի համար՝ թույլ տալով կոպտագույն օրենսդրական խախտումներ:

Մինչ այդ civic.am կայքի լրագրողը ասուլիսիսն ներկա «Հայաստան» խմբակցության պատգամավոր Ագնեսա Խամոյանին մեղադրեց գերիների վերաբերյալ Նիկոլ Փաշինյանի՝ ԱԺ-ում արած հայտարարությունը միտումնավոր խեղաթյուրելու մեջ:

Խամոյանը չպատասխանեց կայքի լրագրողին՝ շեշտելով, որ այն Հայաստանում ապատեղեկատվություն տարածող կայքերի առաջին պատվավոր հորիզոնականն է զբաղեցնում և սպասարկում է իշխանության շահերը:

Արծվիկ Մինասյանը civic.am կայքի լրագրողին և մասնագետներին առաջարկեց ուսումնասիրել Ժնևյան կոնվենցիան, Հայաստանի ներպետական օրենսդրությունը, որից հետո նոր հայտարարություններ անել:

«Մեր քաղաքացիները գտնվում են գերեվարված վիճակում, Փաշինյանի առաջին խնդիրն է այդ քաղաքացիներին վերադարձնել հայրենիք, ի՞նչ է նշանակում քննություն պետք է իրականացնենք, լավ է, որ չի ասում՝ Ալիև, մի հատ քննություն արա՝ նոր գերիներին ինձ ուղարկի»,-շեշտեց ընդդիմադիր պատգամավորը և նկատելով, որ Փաշինյանը դրանով արդարացնում է, որ ադրբեջանական դատարանները պատիժներ են սահմանել մեր քաղաքացիենրի նկատմամբ,  հարցրեց. «Դա՞ եք հայտարարում, թե՞ էս գլխից ասում եք, որ մեր քաղաքացիների հետևից  չեն գնալու»:

Պատգամավորի կարծիքով՝ ոչ մի պաշտոնատար անձ, առավել ես՝ կառավարության ղեկավարը իրավունք չպետք է ունենար ԱԺ ամբիոնից այդպիսի հայտարարություններ անել:

Արծվիկ Մինասյանը նաև տեղեկացրեց, որ քառօրյայի օրակարգում ընդդիմությունն առաջարկել էր հրատապ կարգով քննել գերիների հարցը և առաջարկել, որ որպես հասարակությանը հուզող հարց գործընթացը հրապարակային լինի, բայց իշխանական պատգամավորներն այն տեղափոխել են փակ ռեժիմ: