Ձեր վստահելի աղբյուրը

Վրաստանի Ժողովրդական պաշտպանի գրասենյակը և դրա հովանու ներքո ստեղծված փորձագետների խումբը հայտնում են, որ երկրի նախկին նախագահ Միխեիլ Սաակաշվիլին կարող է կոմայի մեջ ընկնել։

Նրանք  կոչ են անում Վրաստանի նախկին նախագահին անհապաղ տեղափոխել բարձր տեխնոլոգիաների բազմամասնագիտական ​​հիվանդանոց։ Այս մասին ասվում է Վրաստանի օմբուդսմենի՝ այսօր տարածված հայտարարության մեջ, հայտնում է «Նովոստի-Գռուզիա»-ն։

Նոյեմբերի 18-ին՝ հացադուլի 49-րդ օրը, Սաակաշվիլին Գլդանիի բանտի հիվանդանոցում կորցրել էր գիտակցությունը, ինչից հետո տեղափոխվեց վերակենդանացման բաժանմունք։ Նախօրեին Վրաստանի օմբուդսմենի բժիշկների խումբն այցելեց ՔԿՀ և զննեց հիվանդին։

Փորձագետների կարծիքով՝ երրորդ նախագահի մոտ «զարգացել է ամենածանր բարդություններից մեկը», որն առաջացել է տևական հացադուլի հետևանքով։ Նրա մոտ առկա են ջղաձգումներ։

Բժիշկները նշում են, որ ուղեղում կիզակետային պրոցեսների ամբողջական գնահատման համար մագնիսական ռեզոնանսային տոմոգրաֆիայի (ՄՌՏ) հետազոտություն է անհրաժեշտ։ Նաև էլեկտրաէնցեֆալոգրամ (ԷԷԳ) պրոցեդուրա է առաջարկվում:

«Ելնելով այն հանգամանքից, որ վիճակը կրիտիկական է  և հաշվի առնելով սպասվող բարդությունները` հանրային պաշտպանը և փորձագետների խումբը ևս մեկ անգամ կոչ են անում Արդարադատության նախարարությանը,  քրեակատարողական ծառայությանը Միխեիլ Սաակաշվիլիին անհապաղ տեղափոխել աշխատանքի մեծ փորձով պատշաճ գործող բազմապրոֆիլային ​​հիվանդանոց, քանի որ ավելի լուրջ բարդություններն ակնհայտ են, կա կոմայի հետևանքով առաջացած էպիլեպտիկ կարգավիճակի զարգացման հավանականություն, ինչը կարող է մահացու լինել»,- ասվում է հաղորդագրության մեջ։