Ձեր վստահելի աղբյուրը

Թեհրանում կիրակի կայացել է Իրանի Իսլամական Հանրապետության արտաքին գործերի նախարարի և  Ադրբեջանի փոխվարչապետի հանդիպումը, որի ժամանակ պաշտոնյաները համաձայնել են՝ անհրաժեշտ է խորացնել երկկողմ հարաբերությունները։

Ադրբեջանցի պաշտոնյան՝ Շահին Մուստաֆաևը, որը նաև Իրան- Ադրբեջան տնտեսական համատեղ հանձնաժողովի ղեկավարն է, մեկօրյա այցով է եղել Իրանում։

«Իրնա»-ի փոխանցմամբ, կողմերը մտքեր են փոխանակել կովկասյան տարածաշրջանի վերջին զարգացումների, ինչպես նաև երկու երկրների հարաբերությունների շուրջ։

Հանդիպմանը Հոսեյն Ամիրաբդոլլահյանն ուրախություն է հայտնել երկու երկրների տնտեսական կապերի ընդլայնման և երկու ժողովուրդների միջև առկա ամուր կապերի կապակցությամբ։

«Այժմ մենք պետք է օգտվենք երկու կողմերի տնտեսական ներուժից՝ առևտրի, տրանսպորտի, էներգետիկայի և զբոսաշրջության ոլորտներում»,- հավելել է նա։

Հանդիպմանն անդրադարձ է եղել նաև Ադրբեջանի կողմից օկուպացրած հայկական տարածքներում իրականացվելիք ծրագրերին։

«Իրանցի բարձրաստիճան դիվանագետը նաև անդրադարձել է վերջերս ազատագրված հատվածների վերականգնման հարցում Իրանի Իսլամական Հանրապետության հնարավորություններին։ Ամիրաբդոլլահյանը նաև ընդգծել է Իրանի Իսլամական Հանրապետության անփոփոխ դիրքորոշումը՝ աջակցում է երկրների տարածքային ամբողջականությանը, շեշտել է  միջազգային սահմանների անփոփոխ լինելը»,- գրում է իրանական աղբյուրը։