Ձեր վստահելի աղբյուրը

Ազգային ժողովի նախկին պատգամավոր Սոֆյա Հովսեփյանն այն քաղաքացիների թվում է եղել, որոնք առավոտյան Երևանի փողոցները փակելու համար բերման էին ենթարկվել: Նրան արդեն ազատ են թողել:

«Բերման էին ենթարկել, իբրև թե սահմանափակում ենք քաղաքացիների ազատ տեղաշարժը»,- Panorama.am-ի հետ զրույցում ասաց Ս. Հովսեփյանը:

Նա ոստիկանների գործողություններն իրավաչափ չի համարում:

«Այսօր սահմանափակված է ճակատենցու, շուռնուխցու անգամ անվտանգ տեղաշաժը սեփական համայնքի մեջ, Երևանում 44 րոպեն սահմանափակում են համարում»,- ասաց նախկին պատգամավորը:

Նա ներողություն է խնդրում այն անձանցից, որոնք այսօր իր իր ընկերների արդար պահանջի պատճառով անհանգստացել են և ուշացել աշխատանքից և հիշեցնում Շուռնուխի, Որոտանի, Ճակատենի և այլ գյուղերի բնակիչների ազատ և անվտանգ տեղաշարժի իրավունքը՝ վտանգելով նաև ապրելու իրավունքը։

Սոֆյա Հովսեփյանը հայտնեց, որ այսօր գործողությունները շարունակվելու են. ժամը 14.00-ից Հանրապետության հրապարակից՝ կառավարության մոտից գնալու են նախագահական և Աժ, վերադառնալու են Հանրապետության հրապարակ՝ ժամը 17:00-ի հարահավաքի:

«Խնդրում եմ նաև ինձ սահման գնալու կոչ անելու փոխարեն, կազմակերպվենք և գնանք միասին սահման, ով առաջարկում է գնալ, խնդրում եմ + դրեք իմ գրառման տակ և միասին մի մեծ խմբով կգնանք, թե Արցախ, թե Սյունիք, թե Տավուշ և այլն։

Սպասում եմ...

Նաև շնորհակալ եմ այն մարդկանց, որոնք հասկանում են մեր երկրի առաջ ծառացած վտանգները և այսօր դուրս կգան մեզ հետ «Ազատագրական պայքարի»»,- դուրս գալուց հետո ֆեյսբուքյան էջում գրել է Ս. Հովսեփյանը: 

Հիշեցնենք, որ այսօր առավոտյան Երևանի կենտրոնական փողոցներում երթևեկությունը կաթվածահար էր Ազատագրական շարժման նախաձեռնողները տեղեկատվական ակցիա էին իրականացնում՝ փակելով փողոցները։ Ակցիա մասնակիցները բոլորին կոչ էին անում այսօր, ժամը 17:00-ին հավաքվել Երևանի Հանրապետության հրապարակում՝ տեր կանգնելու մեր երկրին ու պետականությանը։ Ոստիկանությունից  Panorama.am-ին հայտնել էին, որ առավոտյան Երևանի փողոցները փակած 18 քաղաքացի տարվել է ոստիկանություն։