Ձեր վստահելի աղբյուրը

«Կապան-Ճակատեն ճանապարհին ադրբեջանական անցակետի տեղադրելուց հետո կոնկրետ Սյունիքում մեր հայրենակիցների խնդիրներն ավելի են խորացել»,- լրագրողների հետ զրույցում ասաց «Հայաստան» խմբակցության պատգամավոր, «Վերածնվող Հայաստան» կուսակցության նախագահ Վահե Հակոբյանը:

Նա նշեց, որ Հայաստանը Գորիս-Կապան Մ2-ի հատվածը կորցնելով, կորցրել է նաև Կապան-Ճակատեն  ճանապարհը: Վ.Հակոբյանի խոսքով, այժմ 4 գյուղի 600 բնակիչ Կապան գնալու համար ստիպված են շրջադարձ կատարել Մեղրիով, Քաջարանով, որի երկարությունը 150 կմ է:

Ինչ վերաբերում է Տաթևից Կապան այլընտրանքային ճանապարհին, ընդդիմադիր պատգամավորն ասաց, որ այդ ճանապարհը կառուցված է սխալ  նախագծով, բավականին նեղ է և արդեն շատ դժվար անցանելի, քանի որ հիմա բոլոր մեքենաների հոսքն այդ ճանապարհով է: Իսկ երբ ձյուն գա, ճանապարհը սառուցապատվի, Վահե Հակոբյանի խոսքով, այն լինելու է անանցանելի, բլոկվելու են  քաղաքացիները Կապանում, Քաջարանում և Մեղրիում:

Դիտարկմանը՝ Ադրբեջանը Քարվաճառի կողմից ինտենսիվ ճանապարհաշինարարություն է  իրականացնում, տեսակետ կա, որ հենց դա է լինելու ճանապարհ կամ միջանցք՝ Քարվաճառից միանալով Նախիջևանին, ընդդիմադիր պատգամավորն ասաց. «Անցած շաբաթ գտնվում էի Սյունիքում, այդ թվում գնացել էի նայելու նաև այդ ճանապարհը:

Երբ որ 2020 թ. նոյեմբերի 9-ին դավաճանական փաստաթուղթը ստորագրվեց և փորձեցին այդ պայմանավորվածությունն իրականացնել, այդ ժամանակ Զանգելան-Օրդուբադ ճանապարհն էր քննարկվում, որին շատ կտրուկ արձագանքեցին Իրանի իշխանությունները, զորք կուտակեցին այդ հատվածում, հնչեցին սպառնալիքներ:

Հետո պարսկական զորքը հեռացավ այնտեղից: Սա նշանակում է, որ Պարսկաստանը որոշ երաշխիքներ ստացավ: Ո՞ւմ կողմից և ո՞նց, չեմ կարող ասել:

Դրանից հետո միանգամից շատ ինտենսիվ տեմպերով կառուցվում է Անգեղակոթ–Շաղատ ճանապարհը: Հաջորդ հատվածը Նախիջևանի սահմանն է և ադրբեջանցիներն արդեն իսկ  կառուցել, վերջացրել են մաքսային տերմինալ:

Հիմա ադրբեջանցիների ակտիվությունն հենց այդ հատվածում առնվազն իրավունք է մեզ տալիս մտածել, որ ադրբեջանիցները փորձելու են այդ տեղով ստանալ ճանապարհ:

Նիկոլ Փաշինյանը  հասկանալով, որ դրա տակ մտնելով, կդառնա իր քաղաքական վախճանը, փորձում է հիմա պայմանավորվածություններից հետ կանգնել և իր պատգամավորների ասած զրոյական կետը, միգուցե դա Բրյուսե՞լն էր, որն, ի վերջո, շրջանցելով Մոսկվան, պայմանավորվեցին: Կարծում եմ՝ մեզ մոտ ապագայում սպասվում են շատ արագ և հագեցված զարգացումներ»:

Նա հայտնեց, որ այս շաբաթվա ընթացքում ԱԺ «Հայաստան» խմբակցությունը նախաձեռնելու է լսումներ, հրավիրելու են արտախորհրդարանական բոլոր ուժերին այս իշխանության դեմ մեկ ռազմավարություն մշակելու համար:

Անդրադառնալով ԱԺ ՔՊ-ական պատգամավոր, ԱԺ տնտեսական հարցերի մշտական հանձնաժողովի փոխնախագահ Բաբկեն Թունյանի հայտարարությանը՝ կապված ընդդիմադիր պատգամավորների կողմից ԱԺ նիստերը բոյկոտելու հետ, մասնավորապես անթույլատրելի է համարում ԱԺ տնտեսական հարցերի մշտական հանձնաժողովի նախագահ Վահե Հակոբյանի բացակայությունը, ինչը, ըստ նրա, խոչընդոտում է  հանձնաժողովի աշխատանքները, ընդդիմադիր պատգամավորն ասաց. «Բաբկեն Թունյանը հերթական անգամ ուզում է գոհացնել իր քաղաքական ղեկավարներին: Նրա կարծիքը միմիայն իր կարծիքն է, որևէ խոչընդոտ չի կարող հանդիսանալ իմ բացակայությունը կոնկրետ նիստը վարելու կապակցությամբ: Դրա համար կա  տեղակալ՝ Բաբկեն Թունյանը, թող բարի լինի, կատարի իր պաշտոնական պարտավորությունները: Եթե ինքն էլ է բացակում, այդ դեպքում… Պայծառ միտք արտահայտեց, որ եթե ինքը չլիներ,  բա ի՞նչ էր լինելու:  Եթե ինքը չլիներ, որևէ կատաստրոֆիկ բան չէր կատարվի, ցանկացած անդամ իրավասու է  հանձնաժողովի որոշմամբ ղեկավարի նիստը»: