Ձեր վստահելի աղբյուրը

Երևանի ընդհանուր իրավասության դատարանում, դատավոր Վահե Միսակյանի նախագահությամբ, «Հայաստան» խմբակցության պատգամավոր,  պրոֆեսոր Արմեն Չարչյանի գործով դատական նիստին  պաշտպան Էրիկ Ալեքսանյանը միջնորդություն ներկայացրեց ՀՀ քրեական դատավարության օրենսգրքի 31-րդ և 35-րդ հոդվածների սահմանադրականության հարցով ՍԴ դիմելու մասին՝ Արմեն Չարչյանի պատգամավորական անձեռնմխելիության հաղթահարման ընթացակարգերի բացակայության հիմքով։

Դատական նիստից հետո լրագրողների հետ զրույցում Էրիկ Ալեքսանյանը  ասաց, որ Քրեական  դատավարության օրենսգրքով նախատեսում է ընթակարգ և  կառուցակարգ մինչդատական վարույթում պատգամավորի անձեռմխելիության հարցի տեսանկյունից. գլխավոր դատախազը դիմում է  ԱԺ թույլտվություն ստանալ քրեական հետապնդում հարուցելու և  ազատությունից զրկելու համար:

«Սակայն դատական քննության փուլում, երբ որ արդեն իսկ առկա է հարուցված հետապնդում, հարուցված հետապնդումից հետո անձը նոր է ձեռք բերում պատգամավորի կարգավիճակ, հետևաբար  նաև Սահմանադրությամբ օժտվում է  անձեռնմխելիության համապատասխան երաշխիքով, այդ ժամանակ  անձեռնմխելիության հաղթահարման տեսանկյունից ընթակարգ և կառուցակարգ չկա:

Ուստի ես գտնում եմ, որ  այդ առումով ունենք օրենսդրական բաց, խնդիր և այդ խնդիրը կարող է լուծել միայն ՍԴ-ն: Այդ իսկ պատճառով  խնդրեցի դատարանին դիմել ՍԴ և  պարզել, թե ինչքանով է Քրեական դատավարության օրենսգրքի 31-րդ և 35-րդ հոդվածները համապատասխանում Սահմանադրությանն այն  տեսանկյունից, որ  չեն նախատեսում կոնկրետ ընթացակարգ և կառուցակարգ արդեն իսկ հարուցված հետապնդման շրջանակներում նոր  կարգավիճակ ձեռք բերած անձի անձեռնմխելիության հաղթահարման տեսանկյունից քրեական հետապնդումը շարունակելու հարցի տիրույթում»,- մանրամասնեց պաշտպանը:

Նա նշեց, որ այս միջնորդությամբ ոչ միայն  բարձրացնում է  ազատությունից զրկելու հարցն անձեռնմխելիության հարցի  տիրութում, այլ նաև քրեական հետապդնումը շարունակելու  հարցի տիրույթում:

«Դատարանը որևէ կաշկանդավածություն չունի, հարցը շատ արդիական և պետք է դիմի ՍԴ այդ հարցերը պարզելու համար»,- ասաց Էրիկ Ալեքսանյանը:

Դատարանում միջնորդության  ներկայացման ժամանակ դատախազն ասել է՝  ՍԴ-ում կա արդեն քննվող նման դիմում: Սակայն Էրիկ Ալեքսանյանի խոսքով, այդ դիմումը և այս միջնորդությունը տարբերվում են իրարից:

Դատախազի նշած մյուս հանգամանքը, որ այս պահին դատարանը չի կարող նման հարցի անդրադառնալ, պաշտպանն ասաց, որ Քրեական դատավարության օրենսգրքի 35-րդ հոդվածը  դատարանը կարող է կիրառել նաև այս փուլում: 

«35-րդ հոդվածը նախատեսում է  այն հիմքերը, որոնցով  դատարանը ղեկավարվելով՝ կարող  է քրեական հետապնդումը դադարեցնել ու վարույթը կարճել: Հիմա օրենքն առհասարակ դատարանին արգելո՞ւմ է  այս պահին վարույթը կարճել:  Բնականաբար, ոչ: Այսինքն ստացվում է, որ  դատարանն այս փուլում կարող է այդ նորմը կիրառել, հետևաբար եթե կարող է, դրա սահմանադրականության  հարցը տեսնելու դեպքում, բնականաբար, պետք է դիմի Սահմանադրական դատարան»,- ասաց Էրիկ Ալեքսանյանը:

Կողմերի դիրքորոշումը լսելուց հետո դատարանը հեռացել է խորհրդակցական սենյակ՝ որոշում կայացնելու։ Դատարանի որոշումը կհրապարակվի վաղը ժամը 12.00-ին։