Ձեր վստահելի աղբյուրը

Երևանի ընդհանուր իրավասության դատարանը, դատավոր Վահե Միսակյանի նախագահությամբ, մերժեց ԱԺ «Հայաստան» խմբակցության պատգամավոր, պրոֆեսոր Արմեն Չարչյանի պաշտպանի միջնորդությունը ՀՀ քրեական դատավարության օրենսգրքի 31-րդ և 35-րդ հոդվածների սահմանադրականության հարցով ՍԴ դիմելու մասին՝ Չարչյանի պատգամավորական անձեռնմխելիության հաղթահարման ընթացակարգերի բացակայության հիմքով։

Ա. Չարչյանի պաշտպան Էրիկ Ալեքսանյանը երեկ միջնորդությունը ներկայացնելուց հետո՝ լրագրողներին ներկայացրել էր, թե ինչու է նման անհրաժեշտութուն առաջացել. «Քրեական  դատավարության օրենսգրքով նախատեսում է ընթակարգ և  կառուցակարգ մինչդատական վարույթում պատգամավորի անձեռմխելիության հարցի տեսանկյունից. գլխավոր դատախազը դիմում է  ԱԺ թույլտվություն ստանալ քրեական հետապնդում հարուցելու և  ազատությունից զրկելու համար:

«Սակայն դատական քննության փուլում, երբ որ արդեն իսկ առկա է հարուցված հետապնդում, հարուցված հետապնդումից հետո անձը նոր է ձեռք բերում պատգամավորի կարգավիճակ, հետևաբար  նաև Սահմանադրությամբ օժտվում է  անձեռնմխելիության համապատասխան երաշխիքով, այդ ժամանակ  անձեռնմխելիության հաղթահարման տեսանկյունից ընթակարգ և կառուցակարգ չկա:

Ուստի ես գտնում եմ, որ  այդ առումով ունենք օրենսդրական բաց, խնդիր և այդ խնդիրը կարող է լուծել միայն ՍԴ-ն»:

Այսօր դատարանի որոշումից հետո Է. Ալեքսանյանը լրագրողների հետ զրույցում ասաց, որ շարունակում է մնալ իր կարծիքն՝ ՍԴ դիմելու հիմքերը կային, սակայն պարտավոր են հարգել նաև դատավորի որոշումը:

«Դատավոր  Միսակյանն այլ կարծիք է, և պարտավոր ենք այդ  կարծիքը, որոշումը հարգել: Ինչու եմ այսպես ասում, որովհետև պարոն Միսակյանն այն  եզակի  դատավորներից է, որ եթե որևէ որոշում կայացնում է, ապա դա իր կարծիքն է: Իսկ  մեր պայքարը շարունակվում է, կորոշենք, թե հետագա քայլերը որոնք կլինեն»,- ասաց պաշտպանը:

Նա նշեց, որ դատարանի որոշմանը ծանոթ չէ, ծանոթանալուց հետո կհասկանա բողոքարկման անհրաժեշտություն կա, թե ոչ:

Ինչ վերաբերում է Արմեն Չարչյանի առողջական վիճակին, Է. Ալեքսանյանն ասաց, որ պահպանվում է շաքարային դիաբետի ծանր ձևը, 100 միավորից ավելի ինսուլին է ստանում, սեփական միջոներով է դա ապահովվում: 

Նա նաև հայտնեց, որ փորձաքննության իրականացման համար բժիշկ փորձագետներն անցել են իրենց գործին, սակայն դեռ եզրակացություն չունեն: Փորձաքննության կատարման վերաբերյալ օրենսդրությամբ ժամկետներ սահմանված չեն:

Էրիկ Ալեքսանյանը հույս ունի, որ շուտով եզրակացությունը պատրաստ կլինի,  կրկին կկարողանան անդրադառանալ Արմեն Չարչյանի խափանման միջոցի հարցին:

Ա.Չարչյանին մեղադրանք է առաջադրվել՝ ՀՀ ՔՕ 154.2-րդ հոդվածի 4-րդ մասի 2-դ կետի հատկանիշներով (ընտրողներին կաշառք տալը, կաշառք ստանալը, ընտրությունների ժամանակ բարեգործության արգելքի խախտումը կամ ընտրողի ազատ կամքի իրականացմանը խոչընդոտելը):
Կալանքի ընթացքում Արմեն Չարչյանի առողջական վիճակը պարբերաբար վատանում է, որոշ ժամանակ քաղաքացիական հիվանդանոցում է բուժում ստացել, այնուհետև կրկին տեղափոխվել է քրեակատարողական հիմնարկ: