Ձեր վստահելի աղբյուրը

Ուղիղ մեկ տարի առաջ 67 տարեկանում մահացավ ՀՀ պետական և ռազմական գործիչ, «Արծիվ մահապարտների միություն» ՀԿ հիմնադիր նախագահ, գեներալ-մայոր Աստվածատուր Պետրոսյանը։

Այսօր «Եռաբլուր» զինվորական պանթեոնում կայացավ գեներալի մահվան տարելիցի ոգեկոչման և հիշատակի հարգման արարողություն, որին ներկա էին Ա. Պետրոսյանի հարազատները, զինակից ընկերները,  «Երկրապահ կամավորականների միություն» վարչության անդամները։

Արցախյան երրորդ պատերազմի ընթացքում՝ ռազմաճակատից նոր վերադարձած գեներալ-մայորը հոկտեմբերի 23-ին հանդիպել էր լրագրողների հետ ու ասել. «Գնում ենք ապրելու, գնում ենք հարվածելու և կայանալու ևս մեկ անգամ, որովհետև Աստված իր ձեռքը դրել է մեր վրա, մենք աստվածային ազգ ենք և մեր լեռնաշխարհի ու ազատության համար ենք կռվում»։

Աստվածատուր Պետրոսյանը Արցախյան շարժման առաջին իսկ օրերից լծվել է հայրենիքի պաշտպանության անձնվեր գործին: 1990-94թթ. եղել է Երկրապահ ջոկատների կենտրոնական շտաբի պետ: Ա. Պետրոսյանին  գեներալ-մայորի զինվորական կոչում է շնորհվել դեռ 1996 թվականին։ 1998-ին պարգևատրվել է «Մարտական խաչ» առաջին աստիճան շքանշանով, 2011 թվականին սեպտեմբերի 1-ին պարգևատրվել է «Հայրենիքին մատուցած ծառայությունների համար» 1-ին աստիճանի մեդալով։