Ձեր վստահելի աղբյուրը

Ամիրյան փողոցում գրեթե կողք կողքի գործող միևնույն ընկերությանը՝ ««Հայր և որդի Երեմյաններ» ՍՊԸ-ի «Բուրգըրի Անգուս» (հասցե՝ Ամիրյան 3/37) և «Պանդոկ Երևան» (հասցե՝ Ամիրյան 5) սննդի կետերում սնված մարդիկ հայտնվել են «Նորք» ինֆեկցիոն հիվանդանոցում։ Պաշտոնական տվյալների հաղորդմամբ, 13 քաղաքացի դիմել և հոսպիտալացվել է Ինֆեկցիոն հիվանդությունների ազգային կենտրոնում:

Չնայած լաբորատոր հետազոտությունների արդյունքները դեռ չկան, Burgery Angus&More ռեստորանը շտապել է սլաքներն ուղղել թռչնամիս մատկարարած ընկերության վրա։

«Վերջին շրջանում երևանյան սննդի տարբեր կետերում հաճախացել են թռչնամսի օգտագործմամբ պայմանավորված թունավորման դեպքերը։ Նմանատիպ իրավիճակ է ստեղծվել նաև Burgery Angus&More ռեստորանում»,- նշել են ռեստորանի ֆեյսբուքյան էջում՝ տեղեկացնելով, որ ռեստորանը փակ է։

Չնայած նույն փողոցում  նույն ընկերությանը պատկանող այլ ռեստորաններ էլ են գործում, բայց դրանց գործունեության դադարեցման մասին որևէ բան նշված չէ։

Հիշեցնենք, որ  «Երեմյան Փրոջեքթս» կազմակերպությանն են պատկանում «Պանդոկ Երևան» ռեստորանների ցանցը, «Երևանի Շաուրմա» արագ սննդի ռեստորանների ցանցը, «Լավաշ» ռեստորանը, «Շերեփ» ռեստորանը, ինչպես նաև «Լիվինգսթոն»-ը, «Սմոքինգ շեֆ»-ը, «Պանդոկ Երեւան. գետափին»-ը։

Ավելին քիչ առաջ՝ «Պանդոկ Երևան»-ն իր ֆեյսբուքյան էջում հայկական թանապուր է առաջարկում։

Աղիքային վարակի նշաններ գրանցվել են նաև «Տաթև» դպրոցի սաների մոտ։ Panorama.am-ի այն հարցին, արդյոք դպրոցին ու ռեստորանին նույն ընկերությունն է թռչնամիս մատակարարում,  ՍԱՏՄ-ից ասացին՝ դեռ չգիտեն։ Վերջին թարմ տեղեկությունները երեկոյան հրապարակվածն են, նորություն լինելուն պես խմբագրությանը տեղյակ կպահեն։

Տեղեկությունների թարմացմամբ են զբաղված նաև Հիվանդությունների վերահսկման և կանխարգելման ազգային կենտրոնում։ Կենտրոնից երեկ երեկոյան նշել էին, որ նոյեմբերի 23-ի ժամը 10:00-ի դրությամբ ռեստորաններում սնված 13 հիվանդներից 4-ը դուրս են գրվել հիվանդանոցից, մնացածի վիճակը գնահատվում է թեթև և միջին ծանրության։ Լաբորատոր հետազոտություններն ընթացքի մեջ են:

Burgery Angus&More ռեստորանի ֆեյսբուքյան էջում իրենց վիճակի, թունավորման պատճառ դարձած ռեստորանի վերաբերմունքի, մեղքը թռչնամսի վրա գցելու միտումի մասին պատմել  ու կարծիք են հայտնել հիվանդանոց ընկած քաղաքացիները։

«Եվ դեռ ինչքան մարդ կա, որ չի դիմել հիվանդանոց համավարակից խուսափելու պատճառով ու դեռ տանը տանջվում է ցավից, իսկ տվյալ ընկերությունը ասում է՝ կուզեք կաթիլային դեղ ուղարկեն բուժքրոջ հետ, ձեզ կաթիլային տա: Երևի էտ ուղեղով էլ ինքնաբուժության մակարդակի սննդի կետ ու ռեստորան են պահել»։

«Ու լավ կլինի ձեր անփութությունն ու հիգիենայի պակասը ընդունեք»։

«Ուղղակի, որ ժամանակ և համբերություն լիներ միայն հոգեբանական , ֆիզիկական ցավի համար կարելի էր դատի տալ ու հաստատ շահել դատը: Այ որ ժամանակին հետևող լինեք էս վիճակը չի լինի ու նման ընկերությունները կփակվեն ընդմիշտ: Ինքս էլ թունավորվել եմ ուրբաթ օրվա սննդից ու ահավոր վատ եմ եղել: Հերիք չի ուտելու փող ենք տվել ու գցել աղբը, մի բան էլ դեղի: Երկրում, որ ամեն տեսչություն իր գործով զբաղվիէս վիճակը չի լինի»։

«Ինքս տուժող եմ, 3 օր անտանելի վատ, շտապ օգնություններով գոյատևել եմ: Առանձնակի վատ բաներ գրել չեմ ուզում, բայց վերջին անգամն է, որ ձեր որեւիցե սննդից կօգտվեմ: Իհարկե կսպասենք արդյունքներին, բայց ասեմ, հավի միս չի եղել»։

Կան օգտատերեր, որոնք  մեկնաբանութուններում գովել են ռեստորանն ու  ուտելիքը։
Օրինակ Hayk Varosyan անունով օգտատերերը գրել է, որ ինքն էլ թունավորված է, բայց Yeremyan projects-ը կապ չունի, թունավորումն էլ տարօրինակ է որակել։ Նա երեք ընկեր ունի, էջում հրապարակված որևէ լուսանկար չկա։

Նման գրառումներին արձագանքել է մի քաղաքացի.

«Նյարդերս խախտվեց ողղակի այսքան ֆեյքերով գրված քոմենթներից, մի մասն էլ պարզապես աշխատող են երևի շողոքորթում են»։

Այս համատեքստում ուշագրավ է Հիվանդությունների վերահսկման և կանխարգելման ազգային կենտրոնի ուշացած հաղորդագրությունը, մարդիկ փսխումով, լուծով ու այլ գանգատներով դիմել սկսել են նոյեմբերի 18-ից, պաշտոնական հայտարարությունը եղել է  չորս օր անց՝ նոյեմբերի 22-ին։ ՍԱՏՄ-ին այս դեպքի մասին ընդհանրապես չի խոսել։

Նշենք, որ նոյեմբերի սկզբին մասսայական աղիքային վարակի դեպքեր գրանցվեցին «Տաշիր Պիցցա» ցանցի սննդի երկու կետերում սնված քաղաքացիների շրջանում։ Տուժածների թիվը, ըստ պաշտոնական տվյալների, հասնում էր 180-ի, ոչ պաշտոնական տվյալներով, նրանք ավելի շատ էին։

Տեսչական մարմինների իրականացրած ստուգումների արդյունքում ցանցի մասնաճյուղերում  հայտնաբերվել էին աղիքային ցուպիկի խմբի մանրէներ (ԱՑԽՄ), աշխատակիցներից վերցված մանրէակրության վերաբերյալ 24 կենսանմուշներից երկուսում հայտնաբերվել է salmonella enteritidis,  ստաֆիլակոկակրության վերաբերյալ քիթ-ըմպանից վերցված 26 քսուքից՝ 9 աշխատակիցների մոտ անջատվել է ստաֆիլակոկ: Սննդամթերքի 16 նմուշից մանրէաբանական հետազոտության արդյունքում  3-ում հայտնաբերվել է ստաֆիլակոկ և սալմոնելլա։

ՍԱՏՄ մասնագետները ստուգումներ են իրականացրել  նաև հանրային սննդի «Տաշիր պիցցա» ցանցում օգտագործվող մայոնեզը արտադրող («Հայր և որդի Ավագյաններ» ՍՊԸ) և թռչնամիս մատակարարող (Սարատովի թռչնակոմբինատ «Կուռնիկով» ՍՊԸ) ընկերություններում։ Սակայն, ինչպես Panorama.am-ին հայտնեցին տեսչական մարմնից, այդ ընկերություննում խախտումներ չեն հայտնաբերվել։ Երեկվանից ստուգումներ են մեկնարկել «Տաշիր Պիցցա»-ի երևանյան բոլոր մասնաճյուղերում։

Ավելի ուշ աղիքային վարակի դեպքեր գրանցվեցին նաև «Էլկա» զարգացման կենտրոնում։ ՍԱՏՄ-ն հայտարարեց  կենտրոնի գործունեության կասեցման ու հայտնաբերած բազմաթիվ խախտումների մասին։