Ձեր վստահելի աղբյուրը

Երևանի ընդհանուր իրավասության դատարանում, դատավոր Սերգեյ Սահակյանի նախագահությամբ, այսօր մեկնարկեց ՀՀ երրորդ նախագահ Սերժ Սարգսյանն ընդդեմ «Քաղաքացիական պայմանագիր» խմբակցության պատգամավոր Խաչատուր Սուքիասյանի գործով դատական նիստը։ Այս գործով որպես պատասխանող է ներգրավվել նաև ՀՀ Ազգային ժողովի աշխատակազմը։

Նրանցից պահանջվում է զրպարտություն հանդիսացող փաստացի տվյալները հրապարակայնորեն հերքել, պատվին ու արժանապատվությանը պատճառված վնասը հատուցել։

Նախքան գործի քննությանն անցնելը՝ դատավորը հետաքրքրվեց հայցվոր կողմից, թե պնդո՞ւմ են հայցը։ Դրական պատասխան հնչեց։ Պատասխանող Սուքիասյանի ներկայացուցիչն ասաց, որ չեն ընդունում հայցը։

Դատավորի հարցին՝ հաշտության եզրեր կարո՞ղ են լինել։ Հայցվոր կողմի ներկայացուցիչն ասաց. «Այո, կարող են լինել, եթե հայտարարվի, որ այն տեղեկատվությունները, որոնք հրապարակվել են, իրականությանը չեն համապատասխանում։ Այդ դեպքում մենք հայցադիմումից կհրաժարվենք»։

Պատասխանողի ներկայացուցիչն ասաց, որ այդ կոնտեքստում հաշտության եզրեր չեն կարող լինել։

Դատավորը հայտարարեց, որ մինչ դատական նիստը դատարանը ստացել է պատասխանող ԱԺ աշխատակազմի միջնորդությունը՝ ՀՀ-ն, ի դեմս ԱԺ աշխատակազմի, պատասխանողների կազմից հանելու մասին։

«Մենք կարծում ենք, որ պատգամավորի կողմից հայտնած կարծիքին առնչվող գործերով Հայաստանի Հանրապետությունը չի կարող լինել պատասխանող»,- նշեց ԱԺ աշխատակազմի ներկայացուցիչը։ 

Դատարանը մերժեց այս միջնորդությունը։

Սերժ Սարգսյանի ներկայացուցիչ Վահագն Գրիգորյանը ասաց, որ իրենց պահանջն է պարտավորեցնել Խաչատուր Սուքիասյանին դատարանի վճիռն օրինական ուժի մեջ մտնելուց հետո յոթ աշխատանքային օրվա ընթացքում ԱԺ հերթական նիստում, իսկ այդ ժամկետը պահպանելու անհնարինության դեպքում ԱԺ հերթական նիստում ուղիղ եթերում ԱԺ ամբիոնից բանավոր հերքել զրպարտություն հանդիսացող «բոլորդ լավ գիտեք երրորդ նախագահը 100 միլիոն դոլարից ավելի կազինոներում կրվել է նույն Բադեն-Բանդենում» արտահայտությունը։ Պաշտպանը ներկայացրեց նաև հերքման տեքստը։

Հայցվոր կողմի երկրորդ պահանջն է՝ պարտավորեցնել ԱԺ աշխատակազմին դատարանի վճիռն օրինական ուժի մեջ մտնելուց յոթ աշխատանքային օրվա ընթացքում ԱԺ պաշտոնական կայքի միջոցով գրավոր հերքել զրպարտություն հանդիսանող Խաչատուր Սուքիասյանի հայտարարությունը։

Երրորդ պահանջն է՝ Խաչատուր Սուքիասյանից բռնագանձել 1 միլիոն դրամ որպես զրպարտության դիմաց փոխհատուցում։  Վ. Գրիգորյանը նշեց, որ հայցվորի կողմից ողջ գումարը անմիջապես կփոխանցվի Զինծառայողների ապահովագրության հիմնադրամին։

«Մենք կարծում ենք, որ Խաչատուր Սուքիասյանը պետք է պատասխանատվություն կրի իր արտահայտությունների համար»,- նշեց Վահագն Գրիգորյանը։

Խաչատուր Սուքիասյանի պաշտպան Աննա Տոնոյանն ասաց, որ Սուքիասյանի հայտարարությունները չեն արատավորում Սերժ Սարգսյանի պատիվն ու արժանապատվությունը, Սուքիասյանի արտահայտությունը փաստական հիմք ունեցող գնահատողական դատողություն էր։

«Խաչատուր Սուքիասյանի արտահայտությունը Սերժ Սարգսյանին չի մեղադրում որևէ հանցանքի կամ զանցանքի կատարման մեջ»,- ասաց ՔՊ-ական պատգամավորի պաշտպանը՝ խնդրելով դատարանին հայցը մերժել։

Սերժ Սարգսյանի պաշտպան Վ. Գրիգորյանը նշեց, որ  Խ. Սուքիասյանի ներկայացուցչի կողմից ներկայացված հայցադիմումի պատասխանում կան իրար հակասող մտքեր։

Ս. Սարգսյանի պաշտպաններից  Ամրամ Մակինյանը հարց ուղղեց Խաչատուր Սուքիասյանի պաշտպանին՝  պատրաստվո՞ւմ են արդյոք որևէ ապացույցի միջոցով ապացուցել այն պնդումը, թե երրորդ նախագահը 100 միլիոն դոլարից ավելի գումար է տարվել կազինոներում:

Սուքիասյանի ներկայացուցիչն ասաց, որ իրենք իրենց ապացույցները կներկայացնեն միայն այն ժամանակ, երբ դատարանը բաշխի ապացուցման պարտականությունները:

«Պատրաստվո՞ւմ եք ապացուցել, թե՞ ոչ։ Եթե ոչ, հասկանանք, որ ձեր պատասխանում ներկայացված՝ Խաչատուր Սուքիասյանը գնահատողական դատողություններ է արել, 13 տարի է խոսում են, մենք ոչ մի փաստ չունենք, մենք էլ ենք լսել, մենք էլ ենք ասում... Եթե դրա մասին է խոսքը, կարող եք պարզ ասել՝  ոչ, փաստեր չունենք, լսել ենք, կարդացել ենք, կրկնել ԱԺ ամբիոնից»,- ասաց Ա.Մակինյանը։

Վ. Գրիգորյանը շարունակեց. «Մի կողմից ասվում է՝ իրականությանը համապատասխանում է, կարող է ապացուցվել, մյուս կողմից ասվում է գնահատողական դատողություն։ Չի կարող այդ երկուսը միաժամանակ լինել։ Մենք ուզում ենք ճշտել, հասկանալ՝ ինչումն է կայանում պատասխանողի առարկությունները։ Ըստ էության, ճշտեցինք, բայց լրացուցիչ հարցեր էլ ունենք, որպեսզի մենք էլ մեր դիրքորոշումն ապացուցման բեռի վերաբերյալ ներկայացնենք»։

Դատական նիստը հետաձգվեց։ Հաջորդ նիստը կկայանա 2022 թ. հունվարի 17-ին։