Ձեր վստահելի աղբյուրը

«Առողջապահության նախարար Անահիտ Ավանեսյանը պարտավոր էր ներկա լինել ՍԴ նիստին, եթե անգամ մասնագիտությամբ իրավաբան չլիներ։ Խոսքը Հայաստանի բարձրագույն մարմնի առջև հաշվետու լինելու մասին է»,- լրագրողների հետ զրույցում ասաց «Հայաստան» խմբակցության պատգամավոր Արամ Վարդևանյանը:

Հիշեցնենք, որ Սահմանադրական դատարանը բանավոր ընթացակարգով քննում է «ՀՀ Ազգային ժողովի պատգամավորների ընդհանուր թվի առնվազն մեկ հինգերորդի դիմումի հիման վրա՝ «Հայաստանի Հանրապետության բնակչության սանիտարահամաճարակային անվտանգության ապահովման մասին» ՀՀ օրենքի 20.1-ին հոդվածի 3-րդ մասի, 22-րդ հոդվածի 3-րդ պարբերության և ՀՀ առողջապահության նախարարի 2021 թվականի օգոստոսի 20-ի N 65-Ն հրամանի՝ Սահմանադրությանը համապատասխանության հարցը որոշելու վերաբերյալ» գործը: Դիմող կողմից ներկայացուցիչը ՍԴ-ում Արամ Վարդևանյանն է:

«Ես առողջապահության նախարարի ներկայացուցիչներին հարցեր չունեմ, իրենք չեն, որ ընդունել են այս հրամանը։ Հրամանն ընդունել է հենց մեկ մարդ՝ առողջապահության նախարարը:  Այդ խայտառակ հրամանն ընդունվել է մեկ մարդու կողմից»,- նշեց Ա. Վարդևանյանը:

Նա ընդգծեց, որ մեկ մարդ չի կարող նման ծավալ կարգավորող հարցեր միանձնյա որոշել, մեկ մարդ չի կարող իր աշխատասենյակում նստի ու նման հրաման ընդունի:

Դիտարկմանը, որ Ա.Ավանեսյանը կառավարության նիստին է ներկա, Արամ Վարդևանյանն ասաց, որ կառավարության նիստերին հաճախ փոխնախարարներն են ներկա, իսկ այսօր այլ տեղ, քան ՍԴ-ն է, նախարարը չլինել չէր կարող, ընդ որում, երբ իր ընդունած ակտն է վիճարկվում։