Ձեր վստահելի աղբյուրը

«Սոչիից ակնկալիքներy մեծ չեն, և կարծես թե մենք կարող ենք արդեն խոսել, որ խոսքը գնալու է դեմարկացիայի և դելիմիտացիայի պրոցեսի մասին, այն է՝ այն երեք առաջարկները, որոնք արել է ՌԴ պաշտպանության նախարարությունը և որոնց մասին ասել է Նիկոլ Փաշինյանը:

Առավելագույնը, ինչ կարող ենք ասել, հերթական հայտարարությամբ մի փաստաթղթի ստորագրում է լինելու, ըստ որի, ,պետք է սկսվի դեմարկացիայի և դելիմիտացիայի պրոցեսը: Այսինքն՝ հանձնաժողովի ձևավորում, որը կզբաղվի այդ հարցերով և այդ հանձնաժողովն է, որը որոշել է՝ որտեղով են անցնելու սահմանները և ինչ պայմաններով»,- նոյեմբերի 26-ին Սոչիում կայանալիք եռակողմ՝ Հայաստան-ՌԴ-Ադրբեջան հանդիպումից ակնկալիքների մասին Panorama.am-ի հարցին պատասխանեց քաղաքագետ Դավիթ Ստեփանյանը և հավելեց, որ այն մաքսիմում ակնկալիքն է, որը Հայաստանը կարող է ունենալ այդ հանդիպումներից:

Panorama.am-ը հետաքրքրվեց, թե արդյոք կապ կա եռակողմ հանդիպումից առաջ Սյունիքում Ադրբեջանի զինուժի ներխուժման, ինչպես նաև Գեղարքունիքի և Տավուշի դիրքերում երկու ժամկետային զինծառայողի զոհվելու դեպքի միջև, քաղաքագետը պատասխանեց. «Կապ միանշանակ կա և այստեղ որևէ նոր բան չկա: Դրանք բանակցություններին ընդառաջ ճնշման միջոց են՝ Ադրբեջանի փորձը ճնշում գործադրել Հայաստանի քաղաքական ղեկավարության վրա, որպեսզի նա ընդունի իր օրակարգը:

Ինչպես երևում է ստացվող ինֆորմացիայից ադրբեջանցիները լավ պատասխան են ստացել Սյունիքում և նրանց ռազմական գործողությունը չի վերջացել նրանով, ինչ ուզում էին: Չնայած զոհերի թիվը չի հանրայնացվում, բայց նրանք բավականին մեծ զոհեր ունեն այնտեղ և չեմ կարծում, որ այդ ճնշման փորձը հաջողությամբ է պսակվել, բայց դրանք ճնշման միջոց են և՛ վաղվա հանդիպմանը, և՛ դեկտեմբերի 15-ին Բրյուսելի հանդիպմանն ընդառաջ»:

Panorama.am-ը նկատեց, որ հանդիպումից առաջ ԱԳ նախարարության մամուլի քարտուղար  Վահան Հունանյանը հայտարարել էր, թե Հայաստանի իշխանությունները Ռուսաստանին տեղեկացրել են առանց նախապայմանների Թուրքիայի հետ հարաբերությունների կարգավորման գործընթաց սկսելու պատրաստակամության մասին և հնարավո՞ր է, որ այն արվել է հենց հանդիպման ժամանակ հարցը քննարկելու համար:

Դավիթ Ստեփանյանը հնարավոր համարեց Պուտին-Փաշինյան հանդիպմանը նաև այդ հարցի քննարկումը, բայց այն այդ հանդիպման գլխավոր նպատակը չի լինելու:

«Ինչ վերաբերում է հայ-թուրքական հարաբերություններրին, ապա մենք տեսնում ենք, որ Հայաստանը կրկին ցանկանում է ապավինել ռուսական մոդերացիային, այսինքն՝ ՌԴ-ն կողմ է լինելու նաև այդ պրոցեսին, եթե այն ընթանա»,- ասաց քաղաքագետը:

Կանխատեսելով, որ Սոչիում կքննարկվի նաև Արցախի Հանրապետության խնդրի քաղաքական կարգավորման գործընթացը՝ Մինսկի համանախագահության համատեքստում՝ Panorama.am-ը  հայտնեց, որ եռակողմ հանդիպմանն ընդառաջ Ադրբեջանի մեջլիսում սկսել են խոսել Մինսկի համանախագահությունից Ֆրանսիային դուրս թողնելու հարցը, և հետաքրքրվեց քաղաքագետն ինչ կարծիք ունի այդ հարցի վերաբերյալ: 

«ԵԱՀԿ Մինսկի խմբի շրջանակներում Արցախի կարգավիճակի բանակցային գործընթացի մասին խոսք գնալու է, սակայն կարծում եմ այդ հարցում որևէ առաջընթաց սպասելը ժամանակավրեպ է: Մինսկի խմբի շրջանակներում արցախյան հարցը դեռ շատ ջուր է քաշելու և իմաստ չունի այսօր սպասել որոշումների:

Ինչ վերաբերում է Ֆրանսիայի հեռացմանը Մինսկի խմբի համանախագահող երկրների շարքից, ապա այն ես բացառում եմ, որովհետև մենք տեսնում ենք, որ նույն համանախագահող 3 երկրի մեջ էլ կա կոնսենսուս: Երբ կա որևէ հարց, ապա այդ երկրներն իրար հետ կարողանում են լուծել և չունեն տարբեր կարծիքներ: Չեմ կարծում, որ Ֆրանսիան կարող է հեռացվել, որովհետև այն ձեռնտու չէ ո՛չ Ռուսաստանին, ո՛չ ԱՄՆ-ին և ո՛չ էլ Հայաստանին, իսկ միայն Ադրբեջանի կարծիքն այդ հարցում շատ քիչ է: Իրականում բանակցությունները շարունակվելու են հենց Մինսկի խմբի շրջանակներում և դեռ շատ երկար են տևելու: Բանակցություններն ընթանալու են Արցախի կարգավիճակի շուրջ՝ հիմնական հունը դա է լինելու»: