Ձեր վստահելի աղբյուրը

ՍԴ-ում կորոնավիրուսի դեմ պարտադիր պատվաստման և թեստավորման մասին առողջապահության նախարար Անահիտ Ավանեսյանի հրամանի սահմանադրականության հարցի քննության ժամանակ ՍԴ դատավոր Հրայր Թովմասյանը պատասխանող կողմ ներգրավված Ազգային ժողովի ներկայացուցիչ Մերի Մոսինյանին մի քանի հարց տվեց:

«Այն անձինք, ավելի քան 450 հազար մարդու մասին է խոսքը, որոնք չեն ենթարկվել նախնական պարբերական բժշկական զննության, տեսականորեն հնարավոր է այդպես, գնում են աշխատանքի վայր, հետո ի՞նչ է լինում: Տեսչական մարմնի որոշմամբ պետք է իրենց արգելվի աշխատանքի գնալ, այդ տեսչական մարմնին ո՞վ է տեղեկացնելու այդ 450 հազար մարդու մասին, գործատո՞ւն է սա անելու, ո՞նց է լինելու»,- հարցրեց Հրայր Թովմասյանը:

Մերի Մոսինյանը պատասխանեց․ «Այդ նորմը չի վերաբերվում բոլոր աշխատողներին, սա առանձին մասնագիտությունների հետ կապված պարտադիր բժշկական զննության պահանջն է»:

Հրայր Թովմասյանն արձագանքեց․ «Դուք ասացիք՝ չի վերաբերում բոլորին, այլ առանձին խմբերի: Իսկ ռեալ իրականության մեջ մենք տեսնում ենք,  որ նախարարի հրամանը վերաբերվում է բոլոր աշխատողներին։  Ճի՞շտ եմ հասկանում՝ դուք հիմա արձանագրում եք, որ նախարարի համար նման պարտավորություն սահմանելու օրենսդրական հիմքը չկա՞ր, դուք դա՞ եք արձանագրում։ Դուք ընդունում եք, որ նորմը հակասահմանադրակա՞ն է»։

«Ոչ: Ես էլի եմ կրկնում, որ ես չեմ դիտարկում 65 հրամանի...»,- ասաց Մ.Մոսինյանը: 

«Լավ եք անում: Դա դնում ենք մի կողմ: Ասում եմ՝ հստակ սահմանված է ընթացակարգ, դուք ասում եք՝ դա չի վերաբերում այս դեպքին: Տրամաբանական հաջորդ հարցը՝ եթե դա չի վերաբերում այս դեպքին, ապա մատնանշեք այն օրենսդրական հիմքը, որով նախարարը սահմանել է նման պարտականություն...»,- կրկին հետաքրքրվեց ՍԴ դատավորը: 

Սակայն պատասխանող կողմի ներկայացուցչից այդպես էլ որևէ հստակ պատասխան չհնչեց այս հարցերի վերաբերյալ: