Ձեր վստահելի աղբյուրը

Սահամանադրական դատարանում շարունակվում է  երեկ մեկնարկած «ՀՀ Ազգային ժողովի պատգամավորների ընդհանուր թվի առնվազն մեկ հինգերորդի դիմումի հիման վրա՝ «Հայաստանի Հանրապետության բնակչության սանիտարահամաճարակային անվտանգության ապահովման մասին» ՀՀ օրենքի 20.1-ին հոդվածի 3-րդ մասի, 22-րդ հոդվածի 3-րդ պարբերության և ՀՀ առողջապահության նախարարի 2021 թվականի օգոստոսի 20-ի N 65-Ն հրամանի՝ Սահմանադրությանը համապատասխանության հարցը որոշելու վերաբերյալ» գործով դատաքննությունը։

Դիմողը՝ ՀՀ Ազգային ժողովի պատգամավորների ընդհանուր թվի առնվազն մեկ հինգերորդը, ՍԴ-ում վիճարկել է առողջապահության նախարար Անահիտ Ավանեսյանի հրամանը, ըստ որի աշխատողները կամ պետք է իրենց միջոցներով թեստ հանձնեն կամ կորոնավիրուսի դեմ պատվաստվեն։ ՍԴ-ում դիմող կողմի ներկայացուցիչ Արամ Վարդևանյանի գնահատմամբ, նախարարի խայտառակ հրամանը հակասահմանադրական է, հարկադրանք աշխատողներին՝ կամ սեփական միջոցներով թեստ հանձնել, կամ պատվաստվել,  խնդրել է բարձր դատարանին ճանաչել այդ հրամանը Սահմանադրությանը հակասող, անվավեր, «քանի որ նման ակտերը չպետք է տեղ գտնեն իրավական  համակարգում»:

Այսօրվա նիստում ՍԴ դատավոր Արևիկ Պետրոսյանը հանդես եկավ միջնորդությամբ. «Նկատի ունենալով այս գործի արդյունավետ  քննության համար պահանջվող տեղեկությունների էական նշանակություն ունենալու  հանգամանքը՝ միջնորդեց ՍԴ-ին քննարկման առարկա դարձնել հետևյալ աշխատակարգային որոշում ընդունելու հարցը՝ կառավարությունից պահանջել հնգօրյա ժամկետում ՍԴ-ին տրամադրել առողջապահության նախարարի հրամանով նախատեսված աշխատող անձանց կողմից 14 օրը մեկ ՊՇՌ  հետազոտության և պատվաստման հետ կապված պահանջերը չկատարելու համար պատասխանատվության ենթարկելու, այդ պահանջերի չկատարման արդյունքում աշխատանքից ազատման վերաբերյալ  տեղեկություններ։

Սահմանված ժամկետում հիշյալ տեղեկությունների անհնարինության դեպքում ՍԴ-ին տրամադրել հնարավորինս ամբողջական տեղեկություններ»։

Դիմող կողմի ներկայացուցիչ Արամ Վարդևանյանն ասաց, որ միջնորդության վերաբերյալ առարկություն չունի, կարծում է՝  նման տեղեկատվությունն ավելի սեղմ ժամկետում ևս կառավարությունը կարող է տրամադրել, պարտավոր են առնվազն ունենալ այդ տեղեկատվությունը։

Պատասխանող՝ առողջապահության նախարարության ներկայացուցչի խոսքով, հաշվի առնելով այն հանգամանքը, որ առողջապահության նախարարությունը չի տիրապետում տեղեկատվությանը՝  ելնելով այն հանգամանքից, որ անմիջապես  վերահսկողություն իրականացնող մարմին չէ, և իրենց ժամանակ է անհրաժեշտ այդ տեղեկատվությունը ստանալու համար, խնդրեց առնվազն հնգօրյա ժամկետը պահպանել։

Արևիկ Պետրոսյանը հստակեցրեց, որ տեղեկատվություն են պահանջում  ոչ թե ԱՆ-ից, այլ կառավարությունից, որը  պետք է հավաքագրում իրականացնի համապատասխան օղակներից։

ՍԴ-ն 2 դեմ, 7 կողմ ձայների հարաբերեկացությամբ ընդունեց աշխակարգային որոշումը Արևիկ Պետրոսյանի միջնորդությունը բավարարելու վերաբերյալ։

ՍԴ դատավոր Հրայր Թովմասյանը նույնպես հանդես եկավ միջնորդությամբ՝ կառավարությունից պահանջել նախարարի 17-Ն հրամանով  նախատեսված սուբյեկտների աշխատավարձի վերաբերյալ տեղեկություն։ Նա նշեց, որ իրեն հետաքրքրող տեղեկատվությունն առավելապես այս սուբյեկտների մեջ նվազագույն աշխատավարձ ստացողների թվաքանակն է։ Հ. Թովմասյանի կարծիքով, այս դեպքում էլ հնգօրյա ժամկետը բավարար կլինի։

Դիմող կողմի ներկայացուցիչն ասաց, որ առարկություն չունի այս միջնորդության նկատմամբ, իրատեսական է այս տեղեկատվությունը ստանալ ավելի կարճ ժամկետում, ինչպես Ա. Պետրոսյանի ներկայացրած միջնորդության դեպքում։

Պատասխանող՝ ԱԺ ներկայացուցիչն էլ առարկություն չունի այս միջնորդության վերաբերյալ։
Պատասխանող՝ առողջապահության նախարարության ներկայացուցիչը կրկին խնդրեց պահպանել հնգօրյա ժամկետը։

ՍԴ դատավոր Վահե Գրիգորյանն ասաց, որ ինչպես նախորդ միջնորդության  դեպքում այդ տեղեկատվության անհրաժեշտություն չի տեսնում, բայց դատավորների համար կարևորություն ունի, դրա համար կողմ է։

Հ.Թովմասյանի միջնորդությունն ընդունվեց միաձայն։