Ձեր վստահելի աղբյուրը

«Պետք է առաջնային հարցին պատասխանել, թե մեզ արդյո՞ք այս ներկայացված մեղադրանքը պարզ է, թե ոչ»,- Երևանի ընդհանուր իրավասության առաջին ատյանի դատարանում հայտարարեց ՀՀ նախկին վարչապետ Վազգեն Մանուկյանի պաշտպան Էրիկ Ալեքսանյանը և խնդրեց դատախազին պատասխանել իր որոշ հարցերի:

Մասնավորապես պատասխանել, թե ինչ է նշանակում մեղադրանքում առկա «բռնություն», «սահմանադրական կարգ» հասկացությունները, քանի որ Վազգեն Մանուկյանը մեղադրվում է իշխանությունը զավթելուն և սահմանադրական կարգը բռնի տապալելուն ուղղված հրապարակային կոչերի համար: 

Փաստաբանը հարցրեց, թե «բռնությունը» ա՞յն է՝ ինչ ամրագրել է Վճռաբեկ դատարանի՝ «ծեծի» վերաբերյալ արտահայտված դիրքորոշման մեջ և նկատեց, որ մեղադրանքի մեջ որևէ բռնության հատկանիշ չի տեսել։

«Անկեղծ ասած՝ ես այսօր պատկերացնում էի, որ դատախազը պետք է գա, մեղադրանքից հրաժարվի»,- ասաց Էրիկ Ալեքսանյանը։

Փաստաբանը դատարանին նաև միջնորդեց՝ Գլխավոր դատախազության դատախազ Կարեն Բիշարյանին հրավիրել դատարան՝ որպես վկա հարցաքննելու համար։

Վազգան Մանուկյանի պաշտպանը պատճառաբանեց, որ Բիշարյանը Սահմանադրական դատարանում արտահերթ ընտրությունների վիճարկման դիմումներում որպես հարակից պատասխանող կողմ անդրադարձել է քարոզչության ընթացքում թեկնածուների ելույթներում, խոսքի և բռնության հրապարակային կոչերի օգտագործման հարցին:

Փաստաբանն ընթերցեց ՍԴ-ում Բիշարյանի ներկայացրած հիմնավորումը. «Նախընտրական քարոզչության ընթացքում բռնության տարրեր պարունակող խոսքի առավել առերևույթ ցայտուն դեպքերը քրեադատավարական ընթացակարգերով ստուգվել և կայացվել են քրեական գործ հարուցելը մերժելու մասին որոշումը։ Դատախազությունը գտնում է, որ կախված խոսքի համատեքստից, խոսքն արտահայտողի անձից, դիտավորությունից, խոսքի բովանդակությունից և ձևից, վնասի հնարավորությունից, այդ չափանիշներով պետք է գնահատել բռնության կոչի և բռնության սպառնալիքի հանրային վտանգավորությունը և քրեական հետապնդման մարմինները ստացված հաղորդագրությունները հենց այս չափանիշներով էլ գնահատման են ենթարկել»։

Ալեքսանյանի ներկայացմամբ՝ Բիշարյանը ՍԴ-ում նաև ասել է, որ նախընտրական քարոզչության ընթացքում թեկնածուների և քաղաքական կուսակցությունների կամ դաշինքների առաջնորդների ելույթներն իրենց ամբողջության մեջ չեն կարող համարվել բռնություն հրահրող, բռնությունը հրապարակայնորեն արդադացնող կոչեր պարունակող։

«Ուզում եմ հասկանալ, պարոն Բիշարյանը ՍԴ-ում երբ այս դիրքորոշումը հայտնել է, հանդես է եկել որպես Կարեն Բիշարյան դատախա՞զ, թե՞ ամբողջ դատախազության դիրքորոշումն է դա և եթե նա այնտեղ հայտնել է դատախազության դիրքորոշումը, ապա ի՞նչ է անում այստեղ մեր դատախազը, քանի որ պարզ տրամաբանությունը հուշում է, որ այդ նույն դիրքորոշումը պետք է ունենա նաև մեր դատախազը»,- ասաց Ալեքսանյանը։

Փաստաբանը նաև հիշեցրեց, որ 2021 թվականի արտահերթ խորհրդարանական ընտրությունների նախընտրական քարոզչության ընթացքում Նիկոլ Փաշինյանի խոսքերը, երբ ասում էր, որ մուրճը վերցնելու են, տալու են բոլորի գլխներին։

«Հիմա այս հայտարարության տիրույթում Բիշարյանն ասում է՝ հանցագործության հատկանիշ չկա»,- նկատեց փաստաբանը և կրկին պնդեց Բիշարյանին դատարան հրավիրելու միջնորդությունը։

Դատարանը մերժեց Վազգեն Մանուկյանի փաստաբանի միջնորդությունը։