Ձեր վստահելի աղբյուրը

Սահմանադրական դատարանում սեփական միջոցներով պարտադիր թեստ հանձնելու կամ կորոնավիրուսի դեմ պատվաստվելու վերաբերյալ առողջապահության նախարարի հրամանի սահմանադրականության հարցի դատաքննությունը հետաձգվեց։ Հաջորդ նիստը նշանակվեց դեկտեմբերի 16-ին։

ՍԴ-ն նման որոշում կայացրեց, քանի որ ներկայացվել էին միջնորդություններ տարբեր հարցերի վերաբերյալ պատասխանող կողմից հնգօրյա ժամկետում պահանջելով տվյալներ։ Միջնորդությունները բավարարվել էին:

ՍԴ նախագահ Արման Դիլանյանը նաև հայտնեց, որ դատարանը պահանջվելու է պատասխանողից ներկայացնել շուկայում գործող թեստավորման նվազագույն և առավելագույն գները, նաև՝ ներկայացվի վիճակագրությունկապված պատվաստված անձանց վարակելիության և վարակվելիության վերաբերյալ տեղեկություն։

Այս տեղեկությունները ՍԴ-ին ներկայացնելու համար սահմանվել է 5 աշխատանքային օր։Դիմող՝ ՀՀ Ազգային ժողովի պատգամավորների ընդհանուր թվի առնվազն մեկ հինգերորդի ներկայացուցիչ Արամ Վարդևանյանը դիրքորոշում հայտնեց հետաձգման ժամկետի հետ կապված՝ նշելով, որ կարող է ավելի շուտ լինել,  քանի որ գործ ունեն մի հրամանի հետ, որի սահմանադրականությունը վիճարկված է, դատաքննության փուլում է, մյուս կողմից այն գործում է։

ՍԴ նախագահ Արման Դիլանյանն ասաց, որ ժամկետը բխում է կոնկրետ դատավարական գործընթացն արդյունավետ կազմակերպելու տեսակետից՝ ներկայացնելով պարզաբանում։

Արամ Վարդևանյանը նշեց, որ  ներկայացած պարզաբանման շրջաններում մտահոգությունը ժամկետի վերաբերյալ համարում է փարատված, բայց միաժամանակ կարծում է, որ ՍԴ-ն կարող էր քննության առարկա դարձնել հրամանի գործողությունը կասեցնելու հարցը մինչև գործով վերջնական որոշում կայացվեր։

Պատասխանող կողմը առարկություն չուներ ժամկետի հետ կապված։

Հիշեցնենք, որ այսօր Սահամանադրական դատարանում շարունակվեց երեկ մեկնարկած «ՀՀ Ազգային ժողովի պատգամավորների ընդհանուր թվի առնվազն մեկ հինգերորդի դիմումի հիման վրա՝ «Հայաստանի Հանրապետության բնակչության սանիտարահամաճարակային անվտանգության ապահովման մասին» ՀՀ օրենքի 20.1-ին հոդվածի 3-րդ մասի, 22-րդ հոդվածի 3-րդ պարբերության և ՀՀ առողջապահության նախարարի 2021 թվականի օգոստոսի 20-ի N 65-Ն հրամանի՝ Սահմանադրությանը համապատասխանության հարցը որոշելու վերաբերյալ» գործով դատաքննությունը։

Դիմողը՝ ՀՀ Ազգային ժողովի պատգամավորների ընդհանուր թվի առնվազն մեկ հինգերորդը, ՍԴ-ում վիճարկել է առողջապահության նախարար Անահիտ Ավանեսյանի հրամանը, ըստ որի աշխատողները կամ պետք է իրենց միջոցներով թեստ հանձնեն կամ կորոնավիրուսի դեմ պատվաստվեն։

ՍԴ-ում դիմող կողմի ներկայացուցիչ Արամ Վարդևանյանի գնահատմամբ, նախարարի խայտառակ հրամանը հակասահմանադրական է, հարկադրանք աշխատողներին՝ կամ սեփական միջոցներով թեստ հանձնել, կամ պատվաստվել,  խնդրել է բարձր դատարանին ճանաչել այդ հրամանը Սահմանադրությանը հակասող, անվավեր, «քանի որ նման ակտերը չպետք է տեղ գտնեն իրավական  համակարգում»: