Ձեր վստահելի աղբյուրը

«Երեմյան Փրոջեքթս» ընկերությանը պատկանող «Բուրգըրի Անգուս ընդ Մոր» ռեստորանում սնված քաղաքացիների շրջանում թունավորումների պատճառների, ընկերության կողմից այսօր տարածած հայտարարության մեջ հայտնած կասկածների վերաբերյալ Panorama.am-ը զրուցել է ԱՆ հիվանդությունների վերահսկման և կանխարգելման ազգային կենտրոնի
վարակիչ և ոչ վարակիչ հիվանդությունների համաճարակաբանության վարչության պետ Ռոմելա Աբովյանի հետ։

Panorama.am- Տիկին Աբովյան, «Երեմյան Փրոջեքթս» ընկերությունը կասկածի տակ է դրել կենտրոնի կողմից հրապարակված լաբորատոր փորձաքննությունների արդյունքների արժանահավատությունը։ Ի՞նչ կասեք այդ կասկածների մասին։

Ռոմելա Աբովյան- Արդյունքների արժանահավատությունը կասկածի տակ դնելն անիմաստ է։ Նախ պետք է նշեմ, որ ՀԿՎԱԿ-ը լաբորատոր կենտրոն չէ, այլ կենտրոն է, որն իրականացնում է հիվանդությունների վերահսկում և կանխարգելում, համաճարակաբանական դիտարկում, պատճառների, պայմանների բացահայտում, այսինքն՝ իրավիճակի գնահատում, բազմակողմանի վերլուծություն։ Զուգահեռ «Ռեֆերենս լաբորատոր կենտրոն»-ի կողմից իրականացնում է  նմուշառումներ և լաբորատոր հետազոտություններ։

Ինչ վերաբերում է լաբորատոր հետազոտությունների արդյունքներին, նախ պետք է ասեմ, որ դրանք իրականացվել ու ավարտվել են ընդունելի ժամկետներում։ Իրականացվել են մանրէների, հարուցիչների անջատման հաստատման համար պահանջվող բոլոր հետազոտությունները՝ համաձայն սննդային գործոնով պայմանավորված աղիքային վարակին բնորոշ դեպքերի ժամանակ միկրոօրգանիզմների հայտնաբերման ու նույնակացման համապատասխան մեթոդների։ Այսինքն արժանահավատության մասով այստեղ կասկած չկա։

Բացի լաբորատոր հետազոտություններից, ՀԿՎԱԿ-ը համարվելով արագ արձագանքման կենտրոն, անմիջապես 24/7 գրաֆիկով իրականացնում է համաճարակաբանական դիտարկում տեղում։ Մեր մասնագետները եղել են այդ կազմակերպությունում ՍԱՏՄ մասնագետների հետ, իրականացրել են դիտարկում, որի արդյունքները մեկտեղվել են լաբորատոր փորձաքննությունների արդյունքների հետ, և ընդհանուր եզրկացության ենք եկել։

Panorama.am- Ի՞նչ են ցույց տվել տեղում դիտարկումները։

Ռոմելա Աբովյան- Նշված կազմակերպությունում չէին պահպանվում սանիտարահիգիենիկ կանոնները, մասնավորապես խախտվել են արտադրական գործընթացի հաջորդականության սկզբունքը, ինչը շատ ավելի կարևոր է երկրորդային աղտոտման կանխման համար։ Հում սննդամթերքի և պատրաստի սննդամթերքի խաչաձև բաղարկումը պետք է բացառվի նման կազմակերպություններում։

Panorama.am- Ի՞նչ է դա ենթադրում, կմանրամասնե՞ք։

Ռոմելա Աբովյան- Սահմանված պահանջ է։ Ավելի պարզ ասեմ, օրինակ, չի թույլատրվում հում հումքը պատրաստիի հետ նույն տախտակի վրա կտրատել, նույն դանակը օգտագործել։ Հում մթերքը պետք է մտնի մի մուտքից, պատրաստին դուրս գա մյուս մուտքից։ Պետք է հնարավորինս այնպես անել, որ հում սննդամթերքը պատրաստիի հետ չխաչաձևի։ Նույնը վերաբերում է մթերքի պահպանման կանոններին, պետք է լինեն տարբեր սառնարաններ, եթե նույն սառնարանն է, պետք է դարակաշարերը տարբեր լինեն։ Այս ամենն արվում է, որպեսզի պատրաստ սննդամթերքը, որը այլևս ենթակա չէ ջերմային մշակման չաղտոտվի, երկրորդային աղտոտման չենթարկվի։

Նշված կազմակերպությունում, հաշվի առնելով, որ հոսքայնությունը խախտվում է, կա հավանականություն, որ հում և պատրաստի սննդամթերքները կարող են իրար հետ խաչվել, իսկ դա ռիսկ է պատրաստի սննդամթերքի աղտոտման համար։ Այդ կազմակերպությունում խախտվում էին սննդամթերքի պատրաստման ու պահպանման կանոնները, պատշաճ չեն իրականացվել մակերեսների մաքրման, ախտահանման աշխատանքները, ինչ մասին վկայում է արտաքին միջավայրի առարկաների մակերեսներից լաբորատոր փորձաքննության արդյունքում հայտնաբերված մանրէային աղտոտվածությունը։

Մենք արդեն հրապարակել ենք, որ  մակերեսներից վերված 49 լվացուկներից 18-ում հայտնաբերվել են աղիքային ցուպիկի խմբի մանրէներ (ԱՑԽՄ) և երկուսում ոսկեգույն ստաֆիլակոկ։ Դա իր հերթին նշանակում է, որ իրականացվել են ոչ ճիշտ ախտահանման աշխատանքներ, կամ ախտահանիչ միջոցը սահմանված կարգով գրանցված չէ, չունի կից մեթոդական ուղեցույց, աշխատակիցները չեն տիրապետում տոկոսայնությանը, պատճաշ ձևով չեն ախտահանում ձեռքերը գրանցված ախտահանիչով, ինչի հետևանքով ձեռքերի միջոցով մանրէն կարող են մի սննդից փոխանցվել մյուսին կամ իրենց մանրէն փոխանցել սննդին։ 

Շարունակելի։