Ձեր վստահելի աղբյուրը

«Հայ Դատի նվիրյալները համատարած հուսահատության պայմաններում քայլ անգամ չեն նահանջել հայերի շահերի պաշտպանության դիրքերից»,- ՀՅԴ Հայ Դատի խորհրդաժողովի բացման արարողության ժամանակ ունեցած ելույթում հայտարարեց ՀՅԴ ԳՄ ներկայացուցիչ, ԱԺ փոխխոսնակ Իշխան Սաղաթելյանը:

Հայտարարելով, որ դժվար ժամանակներն են, որ ի հայտ են բերում իրական նվիրյալներին և ազգային էլիտային՝ Սաղաթելյանը շեշտեց, որ իրենք կրկին հավաքվել են համակարգելու, համադրելու և նոր թափ տալու Հայ Դատի աշխատանքներին մի իրավիճակում, երբ նրա գործունեության առանցք հանդիսացող Արցախի Հանրապետության մեծ մասը գտնվում է թշնամու տիրապետության տակ:

Ըստ ՀՅԴ ԳՄ ներկայացուցչի՝ Հայաստանի առջև այսօր ծառացած է համակարգային խոշոր ճգնաժամ և իշխանությունների պնդումները, թե ընտրություններից հետո ճգնաժամը հաղթահարված է, խաբեություն է,, իսկ ճգնաժամն ավելի է խորանում՝ մոտենալով անվերադարձ լինելու կետին։

Իշխան Սաղաթելյանը հայտարարեց, որ պետք է վերականգնել երկրում սահմանադրականությունը, կազամակերպել երկրի սահմանների պաշտպանությունը և, ելնելով նոր իրողություններից, մշակել հայեցակարգ՝ իրականացնելով համակարգային բարեփոխումներ անվտանգության, տնտեսության ոլորտներում, որի հիմքում պետք է դրվի հայրենասիրական ազգային դաստիրակությունը:

Բանախոսը կոչ արեց չհաշտվել ինքնիշխանության կորստի հետ, հաղթահարել նվաստացումը, կառավարել ռիսկերը, վերականգնել արժանապատվությունը, հաղթահարել փոքր պետություն լինելու հոգեբանական բարդույթը։

«Այս պահին պետք է ձևավորել դիմադրություն, դիմադրություն՝ թշնամուն, որ մենք չունենք զիջելու հայրենիք, դիմադրություն՝ հայրենիքը զիջումների տանող օրվա իշխանություններին, դիմադրություն՝ հանրային կյանքում տեղի ունեցող բոլոր ապօրինություններին, իսկ երբ հասնենք համազգային և համաժողովրդական դիմադրության, թշնամին կհեռանա մեր տնից, իսկ օրվա իշխանությունները՝ իրենց աթոռներից»,- հայտարարեց ԱԺ փոխնախագահը՝ վստահեցնելով, որ դրա ներուժը հայ ժողովուրդն ունի, բայց Ժամանակը սուղ է, կամ այն կօգտագործենք մեր օգտին, կամ կկորցնենք անվերադարձ: 

Ընդգծելով, որ հայի ներուժը 10 մլն հայությունն է՝ Սաղաթելայնն ասաց, որ Հայաստանի վերականգնումը անհնար է առանց Սփյուռքի, որը խորն է և բազամաշերտ։

«Անհրաժեշտ են նոր մոտեցումներ, նոր միասնական օրակարգ։ Ինչի համար նախ անհրաժեշտ է համազգային նպատակների սահմանում, հայրենիքով ապրելու և հպարտ լինելու միջավայր, հայրենադարձությունը խրախուսող նոր ռազմավարություն, պետականաշինության մեջ սփյուռքահայության անխուսափելի մասնակցություն»,- հայտարարեց  ԱԺ փոխխոսնակը։

Իշխան Սաղաթելյանը ընդգծեց, որ Հայաստանում պատեհապաշտության, հարմարվողականության քարոզը ապագա չունի։

«Արցախի և Սյունիքի ճակատագիրը կախված չէ մեկ պաշտոնյայի որոշումից․ Արցախի և հայ ժողովրդի ճակատագիրը մեր ձեռքերում է, եկեք չմոռանանք՝ Արցախը մեր ժառանգությունն է, մեր անվտանգությունը, ապրելու և ապրեցնելու բնական իրավունքը։ Արցախը մեր հող ու ջուրն է, մեր արյունը, մեր ինքնությունը։ Նահանջել չկա, հետ քայլ չկա, պայքարը պետք է շարունակել»,-եզրափակեց ԱԺ փոխխոսնակը։