Ձեր վստահելի աղբյուրը

ՀՀ երկրորդ նախագահ Ռոբերտ Քոչարյանի որդին՝ Լևոն Քոչարյանը, այսօր Գորիս է մեկնել՝ ներկա գտնվելու Գորիսի համայնքապետ Առուշ Առուշանյանի գործով դատական նիստին։

«Եկել ենք աջակցելու, որպեսզի իրեն մենակ չզգա այս անարդարության, այս պրոցեսների մեջ,  իմանա, որ իր ընկերներն իր հետ են, իր կողքին» ,- լրագրողների հետ զրույցում ասաց Լևոն Քոչարյանը։

Նրա խոսքով, Առուշ Առուշանյանի, Մխիթար Զաքարյանի և Մանվել Փարամազյանի հանդեպ իշխանությունն անձնական վրեժխնդրություն ունի։

«Փոքրոգի, ճղճիմ մարդու վրեժխնդրություն է սա։ Այս իշխանությունն իր ղեկավարով կարծես մոլուցք ունի ընդդիմադիր հայացք ունեցող մարդկանց մեկ օր ավելի բանտարկված պահել, կարծես իրենց կյանքի նպատակը լինի»,-ասաց  նա։

Լևոն Քոչարյանի կարծիքով, Սյունիքի համայնքապետերին կալանավորելը, մեկուսացնելը, ովքեր այս պատերազմում մեծ դերակատարություն ունեցան, զենք վերցրեցին,  պաշտպանության կազմակերպեցին, շատ ուղղակի նաև անվտանգային հարցեր է առաջացնում կոնկրետ այդ մարզում։

«Բայց միամիտ պետք է լինել կարծելու, որ բանտարկելով Առուշին կամ մյուս տղաներին՝ կարող են ընկճել: Կարծում եմ՝ այս ամեն ինչով ուզում են հուսահատության ավելի մեծ ալիք բարձրացնել բնակչության մոտ, հետագայում, ըստ օդում կախված լուրերը, թե ինչ են պատրաստվում անել, հեշտ անցկացնեն: Սա եմ տեսնում», - ասաց Լևոն Քոչարյանը։

Նա նշեց, որ Սյունիքի բնակչությունը, ընդհանրապես ՀՀ բնակչությունը պետք է կոնկրետ  արտահայտի իր վերաբերմունքն այս ապօրինությունների հանդեպ: