Ձեր վստահելի աղբյուրը

«Երեմյան Փրոջեքթս» ընկերությանը պատկանող «Բուրգըրի Անգուս ընդ Մոր» ռեստորանում սնված քաղաքացիների շրջանում թունավորումների պատճառների, ընկերության կողմից տարածած հայտարարության մեջ հայտնած կասկածների վերաբերյալ Panorama.am-ը զրուցել է ԱՆ հիվանդությունների վերահսկման և կանխարգելման ազգային կենտրոնի վարակիչ և ոչ վարակիչ հիվանդությունների համաճարակաբանության վարչության պետ Ռոմելա Աբովյանի հետ։

Հարցազրույցի առաջին մասը՝ այստեղ։

Panorama.am- Տիկին Աբովյան, «Երեմյան Փրոջեքթս» ընկերության «Բուրգըրի Անգուս ընդ Մոր» ռեստորանում դիտարկումների արդյունքում աշխատակիցների մոտ հայտնաբերվել են աղիքային վարակիչ հիվանդությունների հարուցիչներ։ Ինչի՞ մասին է դա վկայում։

Ռոմելա Աբովյան- Կառավարության 347Ն որոշումը հստակ պահանջ է սահմանում հանրային սննդի կազմակերպությունների աշխատակիցների նախնական, պարբերական բուժզննումների անցկացման վերաբերյալ։ Նրանք տարեկան երկու անգամ պետք է անցնեն մանրէակրության վերաբերյալ հետազոտություն, որպեսզի բացահայտվեն մանրէակիր աշխատակիցները։ Մարդը կարող է լինել մանրէակիր, չունենալ որևէ ախտանշան, բայց իր միջավայրում ձեռքերի միջոցով կարող է տարածել այդ մանրէները։ 

«Բուրգըրի Անգուս ընդ Մոր» ռեստորանում թեև աշխատակիցներն ասացին, որ անցել են բուժզննում, սակայն սանգրքույկ ասվածը ցույց չտվեցին։ Այդ կազմակերպությունում ունենք երեք աշխատակից, որոնցից անջատվել է նույն սալմոնելան, որն անաջատվել է ինչպես պացիենտների կենսանմուշում, այնպես էլ սննդամթերքում՝ տավարի մսի խճողակում։  Ընդ որում պետք է նշեմ, որ պացիենտների կենսանմուշների հետազոտությունն իրականացվել է Ինֆեկցիոն ազգային կենտրոնի կողմից, նույնականացվել է «Ռեֆերենս» լաբորատորիայի կողմից։ Արդյունքում մենք ունենք երեք աշխատակից, որոնք եղել են սալմոնելայակիր, ունենք սննդամթերք, որում եղել է սալմոնելա, ունենք պացիենտների կենսանմուշներում սալմոլենա, և ունենք սանիտարահիգիենիկ ոչ պատշաճ պայմաններ։ Այդ կազմակերպությունում չեն իրականացվել այն բոլոր պահանջները, որոնք սահմանված են նման կազմակերպությունների համար։

Panorama.am- «Երեմյան Փրոջեքթս» ընկերության տարածած հայտարարության մեջ նշվում է, նմուշառում կատարվել է մի շարք մթերքներից, սակայն հայտարարություն է տարածվել միայն ջրի, մակերեսների, լվացուկների ու տավարի հում մսի մասով։ Ինչո՞ւ է ՀՎԿԱԿ-ի հայտարարության մեջ նշվում միայն դրանց մասին։

Ռոմելա Աբովյան-Կենտրոնի հաղորդագրությունների մեջ մենք նշում են անջատված հարուցիչների մասին։ Խմելու ջրի մեջ եթե որևէ բան չի էլ հայտնաբերվում, գրում ենք, որպեսզի հստակ լինի, որ այն ջրային բռնկում չէ։ Դուք պատկերացնո՞ւմ եք, մենք կատարում ենք մի քանի տասնյակ նմուշառում, հերթով գրենք, որ դրանցում խնդիր չի եղել։ Անիմաստ է։ Նշվում է միայն լաբորատոր հետազոտության այն արդյունքները, որոնք խնդրահարույց են ու կարող են կապ ունենալ տվյալ բռնկման հետ։

Panorama.am- Հաջորդ հարցը, որը բարձրաձայնել էր հայտարարության մեջ այդ ընկերությունը, վերաբերում է փորձաքննության ժամկետներին։

Ռոմելա Աբովյան- Կրկնում եմ, մենք առաջանորդվել ենք պարզ ու հստակ մեթոդաբանությամբ, փորձաքննությունները կատարվել են սահմանված ժամկետներում։

Panorama.am-«Երեմյան Փրոջեքթս» ընկերությունը հայտարարում է, որ ԱՆ «Հիվանդությունների վերահսկման և կանխարգելման ազգային կենտրոն» ՊՈԱԿ-ը փորձաքննությունը պատվիրել է իր կենտրոնի «Ռեֆերենս Լաբորատոր կենտրոն մասնաճյուղի» փորձարկման լաբորատորիային, որի հավատարմագրման վկայականը դադարեցված է։

Ռոմելա Աբովյան- Նախ ասեմ, որ կորոնավիրուսային հիվանդության ողջ ծանրաբեռնվածությունը պետպատվերի շրջանակում եղել է «Ռեֆերենս Լաբորատոր կենտրոն»-ի վրա։ Դրա պատճառով հավատարմագրումը ժամակաավորապես դադարեցվել է, բայց դա բացարձակ որևէ նշանակություն չունի։ ԵԱՏՄ տեխնիկական կանոնակարգերը, որ վկայակոչում է ընկերությունը, վերաբերում են մաքսային ու ազգային տարածքներում ապրաքաշրջանառվող արտադրատեսակներին։

Այս պարագայում խոսքը վերաբերում է ոչ թե արտադրատեսակի շուկայահանմանը, այլ արդեն իսկ արձանագրված սննդային գործոնով պայմանավորված աղիքային վարակին բնորոշ դեպքերի արձագանքմանը։ Տեխնիկական կանոնակարգերը սահմանում են, որ ապրանքը պետք է հետազոտվի, հետո շուկա մտնի, իսկ մենք այս պահին ունենք սննդային գործոնով պայմանավորված աղիքային վարակիչ հիվանդության դեպքեր, և մեր կանոնադրությամբ  պարտավոր ենք իրականացնելու համաճարակաբանական դիտարկում՝ զուգորդելով այն լաբորատոր հետազոտություններով։

Ես, որպես մասնագետ, ասեմ, որ նույն սննդի նմուշների լաբորատոր փորձաքննության արդյունքները կարող են լինել տարբեր, դա պայմանավորված է բաղարկման աստիճանից։ ՀՎԿԱԿ-ի հրապարակած արդյունքներն արժանահավատ են, անհերքելի փաստ։

Ընդգծեմ, սալմոնելա հարուցիչը անջատվել է, ինչպես պացիենտների կենսանմուշներից, այնպես էլ «Հայր և որդի Երեմյաններ» ՍՊԸ-ի «Բուրգըրի» հանրային սննդի կազմակերպության աշխատակիցներից և տավարի մսի հում խճողակից, ինչը թույլ է տալիս եզրակացնել, որ սննդային գործոնով պայմանավորված աղիքային վարակիչ հիվանդության հավանական աղբյուրը երկրորդային աղտոտումն է: