Ձեր վստահելի աղբյուրը

ԱԺ Պաշտպանության և անվտանգության հարցերի հանձնաժողովի փոխնախագահ պաշտոնում «Հայաստան» խմբակցության կողմից առաջադրվել է  «Հայաստան» խմբակցության պատգամավոր Արթուր Ղազինյանը: Սա արդեն 14-րդ առաջադրումն է:

Նախորդ անգամները «Քաղաքացիական պայմանագիր»  խմբակցության անդամները  դեմ էին քվեարկել Արթուր Ղազինյանի թեկնածությանը:

«Արդեն 14-րդ անգամ է կարծես այս հարցն արծարծվում: Որպես «Հայաստան» խմբակցության կողմից առաջադրված թեկնածու, դիրքորոշում եմ հայտնել, որ օրակարգին ըստ էության և բովանդակային անդրադառնալու  հարկ կլինի այն ժամանակ, երբ  իշխող մեծամասնությունը կփոխի իր դիրքորոշումը հարցի վերաբերյալ: Կարծես  դիրքորոշումը չի փոխվել, չի էլ փոխվելու»,- ասաց Ա. Ղազինյանը:

Նրա խոսքով, առանց  հիմնական զեկուցողի ներկայության և թեկնածուի ներկայության,  ընթացակարգի պահպանումը խախտվում է, այդ պարագայում  քվեարկություններն իրավազոր չեն. «Դուք պետք է նիստը հետաձգեք, մինչև գա հիմնական զեկուցողը կամ թեկնածուն:  Զեկուցողը ներկայացում է խմբակցությունը:  Խմբակցությունն այս պահին չի մասնակցում, լքում ենք նիստերի դահլիճը: Շարունակեք քննարկել, ձեր մոտ լավ ստացվում է»:

Այս խոսքերից հետո հանձնաժողովի ընդդիմադիր անդամները հեռացան սենյակից:

Այս անգամ ՔՊ-ական պատգամավորները ևս դեմ քվեարկեցին: