Ձեր վստահելի աղբյուրը

«Նիկոլը վախեցավ եռակողմ հանդիպման ժամանակ խոսել Արցախի ժողովրդի ինքնորոշման իրավունքի իրացման մասին, իսկ այսօր Սերժ Սարգսյանը «Եդինայա Ռոսիա»-ի հետ միջազգային ֆորումին հրապարակային ասաց, որ Արցախի Հանրապետության ժողովրդի ինքնորոշման իրավունքի իրացումը սակարկման ենթակա չէ»,-մամուլի ասուլիսում հայտարարեց ՀՀԿ ԳՄ անդամ Էդուարդ Շարմազանովը:

Նա նկատեց, որ երբ Նիկոլ Փաշինյանը վախենում է եռակողմ հանդիպման ժամանակ ասել, որ Շուշին և Հադրութը օկուպացված են, փախստականների հարց կա, որ խնդիրը ԵԱՀԿ Մինսկի խմբի համանախագահների ներքո պետք է քննարկվի, ապա, բնականաբար, նման հանդիպման արդյունքում պետք է լիներ այդ բովանդակության հայտարարությունը:

Շարմազանովը նկատեց, որ Սոչիի հայտարարության մեջ Արցախ բառ չկա, այն դեպքում, երբ 44-օրյա պատերազմը և կոնֆլիկտն ընդհանրապես Արցախի շուրջ է եղել:

«Արցախյան 44-օրյա պատերազմի արդյունքում հանդիպման է գնում նաև կապիտուլյացիայի խորհրդանիշը և Արցախի մասին մի բառ չկա գրած»,-նշեց Շարմազանովը և հավելեց. «Արցախի հարցի թաղումը, նրա ադրբեջանամետ լուծումը պոզով-պոչո՞վ է լինում»:

Բանախոսը նաև նկատեց, որ հանդիպմանը խոսվում է դեմարկացիայի և դելիմիտացիայի մասին, երբ Արցախի խնդիրը լուծված չէ:

«Պուտինը հայտարարում է, որ Հայաստանի և Ադրբեջանի միջև սահմաններն հստակ չեն և Փաշինյանն ու Ալիևը ծպտում չեն հանում՝ համաձայնելով դրան, այ Նիկոլ, բա որ այդ սահմանները հստակ չեն, դու ինչպես ես ասել, որ Գորիս-Կապան ճանապարահատվածն Ադրբեջանինն են, ինչպե՞ս ես դրանք Էյվազլի անվանում»,-նկատեց բանախոսը:

Էդուարդ Շարմազանովը նաև անընդունելի համարեց, որ Վլադիմիր Պուտինի նման հայտարարության պայմաններում խորհրդարանում Փաշինյանը հայտարարում է, որ ՀՀ զինված ուժերի վերահսկողության տակ կան ադրբեջանական տարածքներ:

«Ռուսաստանի նախագահը ասում է՝ սահմանը հստակ չի, Նիկոլն ասում է՝ ոնց հստակ չի՝ այս տարածքն Ադբեջանինն է»,-շեշտեց Շարմազանովը՝ անդրադառնալով եռակողմ բանակցությունների բովանդակությանը և հավելեց. «Փաստաթղթում մեկօրյա պատերազմի մասին էլ խոսք չկա, քանի որ այդ բանակցություններում Հայաստանը ներկայացնող չկա:Ռոբերտ Քոչարյանն ասում էր, որ նիկոլը սեղանի վրա է, նա արդեն սեղանի վրա էլ չէ,տշել են մի անկյուն, ասում են՝ ինչ ասենք՝ կստորագրես»:

Էդուարդ Շարմազանովը զարմանք հայտնեց, թե ինչպես կարող է մարդը Երևանից հասնի Մոսկվա և մի խոսք չասի Արցախի ժողովրդի ինքնորոշման իրավունքի մասին: