Ձեր վստահելի աղբյուրը

«Պատերազմի մեկնարկին Արցախի ճանապարհին հանդիպեցի իր ջոկատով պատերազմ մեկնող Աշոտ Մինասյանին, նա ասաց՝ ներսն է թշնամին, մենք պետք է այդ հարցն էլ զուգահեռ լուծենք, թե չէ այս պատերազմը պարտվելու ենք»,- բանաստեղծ Խաչիկ Մանուկյանի հետ «Հայելի» մամուլի ակումբում ասուլիսի մեկնարկին հիշեց ակումբի նախագահ Անժելա Թովմասյանը և խնդրեց բանաստաղծին Մինասյանի ձերբակալության վերաբերյալ իր կարծիքը հայտնել:

Խաչիկ Մանուկյանը, որի որդին զոհվել է 44-օրյա պատերազմում, Հայաստանում կատարվողը նմանեցրեց հայտնի պատմությանը, երբ գիժը քարը քցում է փոսը և ասաց, որ այսօր Փաշինյանը ոչ միայն քարը քցել է փոսն, այլև ասում է, որ այդ քարը՝ մեր երկիրը, մեզ պետք չէ, հայրենիքը պետք չէ, որ մոլորակի վրա հայն անկյուն չունի, թուրքն էլ իր թշնամին չէ, այլ՝ բարեկամը:

Ըստ բանաստեղծի՝ Փաշինյանը շարունակաբար տանում է իր գիծը, քանի որ հասկացել է՝ ստի կայսրության փլուզումն առաջինը իր գլխին է լինելու:

Շեշտելով, որ նա կալանավորում է ժողովրդի կողմից ընտրվածներին՝ Մանուկյանն ասաց. «Գոյանքը հպարտանում է, թե ժողովուրդն իրեն ձայն է տվել, մինչդեռ այդ ձայն տվողները ողորմելի վիճակում են հայտնվել, իսկ իրական հերոսները կալանավորված են: Ես գրառում արեցի՝ իշխանություններին ասելով, որ իրենք ճիշտ են՝ պետք է Նժդեհին ֆաշիստ անվանեին, հերոսներին փակեին, որպեսզի կարողանային հայրենիքը կործանել: Ինչպե՞ս կարող եք կործանել, եթե հերոսներին թողեք դուրսը, հակառակ դեպքում՝ նրանք ձեզ ոտնատակ կտան»:

Բանաստեղծի կարծիքով՝ իշխանությունները գիտեն, որ արդեն սխալվել են, բայց նահանջի տեղ չունեն և արդեն ժամանակի խնդիր է, թե երբ են պատասխանը տալու, որը ցավոտ է լինելու:

Նա հայտարարեց, որ Նիկոլ Փաշինյանը ստում է և այն լցնում է լրատվական դաշտ՝ բերելով ջրի սակագնի թանկացման օրինակը և հիշեցնելով, որ ժամանակին նա էր հայտարարում՝ ջուրը չի թանկանալու:

«Եթե ձեր նպատակն է հերոսներին ամեն կերպ հավասարեցնել սովորական քաղաքացիներին, դուք չեք հաջողելու, մնալու եք հերոսների ստվերների տակ: Բոլոր նրանք, ովքեր դուրս են գալու հերոսների, քաջերի սխրագործությունների դեմ, տրորվելու են նրանց՝ ամենաապրողների ոտքերի տակ, քանի որ դուք ստի ճանապարհն եք բռնել, իսկ նրանց սխրագործությունը հավերժության միտված ճանապարհ է, որովհետև հավատացել են իրենց ազգի հավերժությանը»,- ասաց Խաչիկ Մանուկյանն՝ անդրադառնալով «Հայաստան» համահայկական հիմնադրամի խորհրդի նիստի ժամանակ երկրի նախագահի կոչին, որով նա առաջարկեց մեկ րոպե լռությամբ հարգել պատերազմում զոհվածների և համաճարակից մահացածների հիշատակը:

Բանաստեղծը տարակուսեց, թե այդ դեպքում ինչու մյուս հիվանդություններից մահացածների հիշատակն էլ չհարգեցին:

Նա ցանկանում էր տեսնել այն հաղթական, տիրական ուժը, որը գալու է մաքրամաքուր, անկեղծ կեցվածքով, հզորությամբ և գիտնականին ասելու  է, որ նրան հնարավորություն է տալիս իր միտքը, հնարավորությունները ծառայեցնել մեր ազգին, գալիս է մտավորականին ասելու, որ նրա համախմբումն ազգին ազգ պահող արժեքների շուրջ այսօր շատ կարևոր է:

Բանաստեղծն ասաց, որ այսօր տեսնում է ճիշտ հակառակը, երբ ոտնահարվում է հայոց լեզուն և այսօր արդեն միմյանց աչքալուսանք են տալիս թրքահպատակները՝ ուրախանալով, որ հայերենը՝ որպես քննություն, արդեն պարտադիր չէ բուհ ընդունվելու համար:

Բանաստեծը եզրակացրեց, որ այն նշանակում է՝ հայը հանգիստ կարող է հեռանալ հայրենիքից, քանի որ լեզուն էլ արդեն որպես կապող օղակ վերացվում է:

Մանուկյանը նկատեց, որ այսօր իշխանությունը հեշտությամբ տալիս է այն տարածքները, որոնց վրա իր և մյուսների զավակները իրենց արյունն են տվել:

Վերջին միտումը նա բնական համարեց, քանի որ պատերազմի ժամանակ Փաշինյանը իր զավակին էլ տարավ մի քանի օրով առաջնագիծ, քանի որ այդտեղ էլ ուզում էր PR կորզել, իսկ այսօր նույն որդին արդեն հոր նման ստում է, որ պատրաստ է իր կյանքը տալ հայրենիքին:

Բանաստեղծը հարց ուղղեց Աշոտ Փաշինյանին, որ եթե պատրաստ էր կյանքը տալ, ապա ինչու պատերազմի ժամանակ իրեն մազապուրծ բերեցին Հայաստան:

Նկատելով, որ այսօր պատիժներ է սահմանվել, գումարներ են կորզվում հայհոյանքի համար, բայց և պատիժ չկա ստախոսության դեպքում՝ Խաչիկ Մանուկյան ասաց. «Սուտը, որ արժեցավ հազարավոր կյանք, սուտը, որ արժեցավ հայրենիքի կորուստ, այդ ստի պատասխանն անպայման պետք է տան, եթե չլինի այդ պատասխանը և հերթական իշխանափոխություն ու անցումներ են լինելու, ապա այս երկիրը որպես պետություն գոյություն ունենալ չի կարող»:

Բանախոսը բացատրեց, որ հակառակ դեպքում ստացվում է՝ ամեն մեկը կարող է գալ, իր արկածային մոտեցումներով, ստով, պատեհապաշտությամբ հայրենիքը կործանել և որևէ հատուցում չտալով հեռանալ ասպարեզից:

Խաչիկ Մանուկյանը հայտարարեց, որ իր համար հերոսապատումը շարունակվում է և հավատում է, որ ազգի մեջ կան հերոսներ, նրանք լինելու են և կերտելու են ապագան: