Ձեր վստահելի աղբյուրը

«Մենք շատ ծանր օրեր ենք ապրում: Արդեն փաստ է, որ մեր հայրենիքի մի կարևոր հատված՝ Սյունիքի հատվածը, վտանգի տակ է»,- ՀՀ դատախազության շենքի դիմաց արցախյան երեք պատերազմների լեգենդար մասնակից, «Սիսական» ջոկատի հրամանատար, գնդապետ Աշոտ Մինասյանին (Աշոտ Երկաթ) կալանավորումից ազատելու պահանջով ակցիայի ժամանակ ասաց  վավերագիր, ռեժիսոր, սցենարիստ Սամվել Թադևոսյանը:

Նրա խոսքով, թեև երկրի իշխանությունները հորդորում են, որ ոչ մի միջանցք չկա, բայց Ադրբեջանի նախագահն իր գործընկերներ, համախոհ պետություններին հայտարարել է, որ կարող են այդ միջանցքով առևտուր անել:

«Լեգենդար Աշոտ Երկաթն այն հրամանատարներից մեկն է, ով ուղղակի վտանգ է ներկայացնում: Աշոտ Մինասյանը մեկ շաբաթ առաջ էր հայտարարել, որ կազմ պատրաստ սպասում են նորից պաշտպանելու մեր սահմանները, եթե որևէ ոտնձգություն լինի: Ինչպես Առուշ Առուշանյանը, Մանվել Փարամազյանը, նաև Աշոտ Մինասյանը այն մարդիկ են, որոնք հզոր անհատականություններ են, էլ չեմ ասում նրանց ուղղակի մասնակցությունը պատերազմին: 

Աշոտ Մինասյանը հերթական այն հրամանատարն է, ով վտանգ է ներկայացնում, քանի որ ամեն  վայրկյան կարող է համախմբել նվիրյալներին, և նրանք դուրս կգան  խրամատներ՝ պաշտպանելու հայրենի սահմանները»,- ասաց ռեժիսորը:

Նա ընդգծեց, որ մինչև հիմա էլ բարձր կարծիք ունի հայ տեսակի մասին, բայց «հրաշալի գիտենք, որ մեր մեջ շատ վաղուց բուն է դրել նաև տականքը»: