Ձեր վստահելի աղբյուրը

ՀՀ դատախազության շենքի դիմաց «Ձայն հայրենեաց» նախաձեռնության անդամներն ու մշակույթի գործիչները հավաք են անցկացնում արցախյան երեք պատերազմների լեգենդար մասնակից, «Սիսական» ջոկատի հրամանատար, գնդապետ Աշոտ Մինասյանին (Աշոտ Երկաթ) կալանավորումից ազատելու պահանջով:

«Մեր պահանջն է՝ վերացնեն այս անհեթեթ ձերբակալությունները: Եթե ուզում եք ձերբակալել, ձերբակալեք թուրք ագրեսորներին, նրանց, ովքեր հատել են մեր պետական սահմանը, մտել մեր սուվերեն տարածք, բռնեք, գերի վերցրեք ու ձերբակալեք: Մի ձերբակալեք այն մարդկանց, որոնք իրենց կյանքով պատասխանատու են եղել երկրի անվտանգության համար, մի ձերբակալեք այն մարդկանց, որոնք պայքարել են, հաղթել են, ազատագրել են ու տվել են ձեզ հայրենիք: Հերիք եղավ այդ ձերբակալությունների շոուները»,- լրագրողների հետ զրույցում ասաց հասարակական, ռազմական գործիչ Գևորգ Գևորգյանը։

Նրա խոսքով, ձերբակալում են՝ անունը դնելով, որ չխուսափեն, չփախչեն քննության ընթացքում. «Ումի՞ց, թուրքի  գյուլից չի փախել Աշոտ Մինասյանը, թուրքի փսլինքից պետք է փախնի՞: Չեք ամաչում, այս ի՞նչ եք անում»:

Գրականագետ Սերժիկ Սրապիոնյանը նշեց, որ այս մարդիկ հարվածի սլաքն առաջին հերթին ուղղում են նրանց նկատմամբ, որոնք արյուն են տվել այս երկրի համար, երկիր են ստեղծել, վերականգնել են երկրի պատմական սահմանները:

«Աշոտ Երկաթին ամենամեծ ցանկությամբ կարող էին ձերբակալման սանկցիա տալ, կալանավորման որոշում կայացնել միայն թուրք-թաթարական դատարանները, որովհետև նրանց համար կարող էր դատվել որպես թշնամի: Մեզ համար նա երկրապահ է»,- ասաց նա:

Ս. Սրապիոնյանի խոսքով, կալանավորելով ազգային արժեքայնությունը բարձր պահող մարդուն՝ ո՞ւմ են թողնում այս երկիրը պահելու, ո՞վ է արդեն այս երկրի տերը. «Այն ճամարտակողնե՞րը, որոնք փողոցներ փակելով վայրահաչում էին՝ մենք ենք տերը մեր երկրի: Սրանց մեջ կա՞ այն տերը, որ այս երկրի արժեքը հասկանա բացի ստամոքսով մտածելու ունակությունից և այս հերոսի համար գա, կանգնի ու ասի՝ հերոսներին չեն դատում, հերոսներին պանծացնում են: Սա հերոսականության գաղափարը մեր ազգի մեջ սպանելու հատուկ մշակված քաղաքականություն է:

Գնացեք ու դպրոցական պատմության դասագրքերը նայեք, որտեղ Վարդան Մաիկոնյանի տեղն աստիճանաբար զիջում են Վասակ Սյունեցուն: Այսինքն, արժեքների 180 աստիճանի փոփոխություն են բերում՝ դավաճանը դառնում է  այս երկրի համար պետքական, իսկ հերոսները վտարվում այս երկրից, դատապարտվում կամ ոչնչացվում»:

Նա նաև հայտարարեց. «Աշոտ Մինասյանը քաղաքական խարդավանքերի զոհ է, քաղբանտարկյալ է  այս պահից սկսած»:

Ս. Սրապիոնյանն ասաց, որ իրենք դիմում են ներկայացնելու գլխավոր դատախազություն, դատախազին խնդրելու են՝ չեղյալ հայտարարել Աշոտ Մինասյանի կալանավորման որոշումը:

«Շատ լավ գիտենք, որ պատասխան չի լինելու, չեղյալ չի հայտարարվելու: Մի երկու ամիս մինչև Սյունիքի վերջնական դատարկվելը որևէ քայլ չեն անելու, փակի տակ են պահելու մեր ընկերներին: Դրանից հետո միայն, այն էլ խոշոր գրավի դիմաց, ոչինչ չարած մարդուն կազատեն: Այս սցենարին արդեն ծանոթ ենք։

Այնքան միամիտ չենք, որ մտածենք այս դատախազը իր տաքուկ կաբինետում վեր ընկած կարող է հանկարծ անսալ ժողովրդի ձայնին: Մենք դրանում համոզված ենք»,- ասաց գրականագետը:

ՀՀ վաստակավոր արտիստ, երգչուհի Աննա Մայիլյանը նշեց, որ նույնիսկ եթե իրենց ձայնը լսելի չլինի, պետք է անպայման ձայն հանել:

«Մենք այսօր այստեղ հավաքվել ենք, որպեսզի պաշտպանեք մեր հայրենիքը պաշտպանած մարդուն»,- ասաց արվեստագետը:

Նա նշեց, որ այսօր այնքան մեղավորություններ կան, որոնք պետք է ապացուցվեն. «Մենք կորցրել ենք 5000 զավակի, 10 հազար անդամալույծ ունենք, վատ վիճակում են: Շատ վաղուց որոշ մարդիկ պետք է դատված լինեին, բայց չեն դատվել»:

Ա. Մայիլյանն ասաց, որ այս ամեն ինչում տեսնում է քաղաքական երանգ:

«Կարծում եմ՝ մենք զբաղված ենք ոչ այն բանով, ինչքով պետք է զբաղված լինեինք: Ունենք վտանգված հայրենիք, հիվանդ հասարակություն, այնպիսի խնդիրներ, որոնց վրա պետք էր ուշադրությունը բևեռել, այլ ոչ նման մարդու, ով նաև առողջական խնդիրներ ունի»,- ասաց ՀՀ վաստակավոր արտիստ, երգչուհի Աննա Մայիլյանը: