Ձեր վստահելի աղբյուրը

Կառավարությունն այսօրվա նիստում որոշել է մերժել Ազգային ժողովի պատգամավորներ Էլինար Վարդանյանի և Արմեն Գևորգյանի հեղինակած օրենսդրական նախաձեռնությամբ առաջարկվող «Հայաստանի Հանրապետության տոների և հիշատակի օրերի մասին» օրենքում լրացում կատարելու մասին նախագծի տարբերակը՝ առաջարկելով սեփականը:

«Հայաստան» դաշինքի պատգամավորներն առաջարկել են «Հայաստանի Հանրապետության տոների և հիշատակի օրերի մասին» օրենքը լրացնել Սեպտեմբերի  27-ով՝ այն սահմանելով որպես Ադրբեջանական բանակի և միջազգային վարձկանների կողմից Արցախի Հանրապետության խաղաղ բնակչության դեմ հարձակման, տեղահանման և պատերազմի զոհերի հիշատակի օր:

Կառավարությունն առաջարկում է հետևյալ տարբերակը. «Հոդված 13.3. Արցախի ժողովրդի դեմ ադրբեջանական ագրեսիայի զոհերի հիշատակի օր՝  նշվում է սեպտեմբերի 27-ին»։

Գործադիրի հիմնավորման  մեջ նշվում է. «Հայաստանի Հանրապետության կառավարությունը Հայաստանի Հանրապետության սահմաններին ծավալվող իրադարձություններով, ռազմաքաղաքական և օպերատիվ իրադրությամբ պայմանավորված՝ ներկա փուլում նպատակահարմար չի համարում օրենքի նախագծի այս տեսքով քննարկումը»:

Կառավարությունն այսօր երկու որոշման նախագծով համապատասխանաբար 3.3 և 1.4 մլրդ ՀՀ դրամ կհատկացնի առողջապահության նախարարությանը կորոնավիրուսի համաճարակի դեմ պայքարելու համար: 1.4 մլրդ դրամով  նախարարությունը կգնի չինական արտադրության Սինոֆարմ պատվաստանյութի 400.000 դեղաչափ:

Նիստի օրակարգում ընդգրկված 29 հարցերի կեսից ավելին՝ 15-ը, վերաբերում է «Հայաստանի Հանրապետության 2021 թվականի պետական բյուջեի մասին» օրենքում գումարների վերաբաշխմանը, զեկուցվող է 2-ը: