Ձեր վստահելի աղբյուրը

Չինական «Յույտու-2» լուսնագնացն ուղարկել է խորհրդավոր խորանարդ առարկայի լուսանկարներ։ «Գազետա ռու»-ի փոխանցմամբ, այդ մասին իր Twitter-ում հայտնել է տիեզերական լրագրող Էնդրյու Ջոնսը։

«Մենք ունենք Լուսնի հակառակ կողմից Յույուտու-2-ից ստացած տվյալների թարմացում: Հյուսիսային հորիզոնում անհայտ խորանարդ առարկա է հայտնաբերվել, այն ստացել է 神秘 小屋՝ «առեղծվածային տուն» անվանումը։ Առաջիկա 3-4 լուսնային օրերի ընթացքում լուսնագնացը կմոտենա՝ պարզելու, թե ինչ է դա։ Սա հաստատ օբելիսկ կամ այլմոլորակային չէ, բայց դեռ արժե ուսումնասիրել: Երբեմն մեծ քարեր դուրս են նետվում ատերոիդների հարվածների հետևանքով, մենք արդեն տեսել ենք նմանատիպ հետևանքներ Chang'e-4 առաքելության ժամանակ»:

Այս պահին հավելյալ տեղեկություններ չեն ստացվում, քանի որ «առեղծվածային տունը» չափազանց անորոշ է երևում։ Լուսնի այս հատվածը կտրտված է հարվածային խառնարաններով, ուստի հավանական է, որ քարի ծագումը աստերոիդի հարվածից է:

«Յույտու-2» լուսնագնացը վայրէջք է կատարել Ֆոն Կարման խառնարանի մոտ 2019 թվականին «Չանգե-4» առաքելության ժամանակ՝ դառնալով Լուսնի հակառակ կողմում գտնվող առաջին լուսնագնացը։ Վերջերս նրա օգնությամբ գիտնականները տվյալներ են ստացել լուսնային թիկնոցի կազմության վերաբերյալ։