Ձեր վստահելի աղբյուրը

Բերման ենթարկված «Դավիթ Համբարձումյան» դաշինքի ավագանու երեք թեկնածուև ևս մեկ անձ երեք ժամ ոստիկանական բաժնում պահվելուց հետո ազատ են արձակվել։ Բերման ենթարկվածների փաստաբան Արման Կարապետյանը Yerevan.today-ի հետ զրույցում ասաց, որ բերման էին ենթարկվել անհայտ քաղաքացու կողմից հնչեցված ահազանգի հիման վրա, իբրև հիշյալ անձինք բռնություն են գործադրել ընտրատարածքում, ընտրատարածքից դուրս։

«Արդեն իսկ այդ ահազանգը  վկայում է  այն մասին, որ չի կարող լինել իրական, վերացական է։ Անձը, ով ահազանգել է, չի էլ ներկայացել»,- ասաց փաստաբանը։

Արման Կարապետյանը ենթադրում է, որ դա կազմակերպված է, նշեց, որ ահազանգը կեղծ է՝ «ֆեյք», հույս ունի իրավապահ մարմիններն իրենց լիազորությունները կիրականացնեն՝ պարզելու, թե ով է եղել այդ անհայտ անձը, ով ահազանգել է, ովքեր են նրա հետևում կանգնած և ինչն է եղել այդ կեղծիքը տարածելու նպատակը։

«Բերման ենթարկված ավագանու թեկնածուն իր բացատրությունում նշել է՝ այս ահազանգի իրական նպատակը «Դավիթ Համբարձումյան»  դաշինքը վարկաբեկելն է, իրենց գործընթացներից շեղելը»,- ասաց փաստաբանը։

Հիշեցնենք, որ Մասիսում այսօր ՏԻՄ ընտրություններ են։ Համայնքապետի համար պայքարում է 2 քաղաքական ուժ՝ «Քաղաքացիական պայմանագիր» կուսակցությունը և «Դավիթ Համբարձումյան» դաշինքը: «Քաղաքացիական պայմանագիր» կուսակցության թեկնածուն Մասիսի ԵԿՄ ղեկավար Սայեն Հայրապետյանն է: «Դավիթ Համբարձումյան» դաշինքի համայնքապետի թեկնածուն Մասիս համայնքի նախկին ղեկավար Դավիթ Համբարձումյանը: