Ձեր վստահելի աղբյուրը

ՏԻՄ համամասնական ընտրությունների քվեարկության նախնական արդյունքներն արդեն հրապարակված են։ Որոշ համայնքերում քաղաքական ուժերն արդեն շնորհավորում են միմյանց, մյուսներն էլ հաղթանակն ամրագրելու համար զբաղված են կոալիցիոն գործընկերոջ փնտրտուքով։

Ինչպե՞ս են բաշխվելու մանդատները։ Արդյո՞ք տվյալ խոշորացվող փնջում քաղաքական ուժի առավել մեծ թվով ձայներ ստանալը նշանակում է հաղթանակ ու քաղաքապետի պաշտոն։ Այդ հարցերի շուրջ Panorama.am-ը զրուցել է Կենտրոնական ընտրական հանձնաժողովի նախագահ Տիգրան Մուկուչյանի հետ։

Panorama.am- Պարոն Մուկուչյան,  ինչպե՞ս է կազմավորվում ավագանին՝ ըստ քվեների։
Տիգրան Մուկուչյան- Տեսեք, սա համամասնական ընտրակարգ է։ Հիմա հաշվարկ է ընթանում։ Առաջին քայլով հաշվում են, թե ով քանի տոկոս ձայներ է ստացել։ Մանդատների բախշմանը մասնակցում են բոլոր այն կուսակցությունները, որոնք առնվազն ստացել են ձայների 4 տոկոսը, եթե դաշինք են, վեց տոկոս քվե։ Դրանից հետո երկրորդ քայլով նայում են, եթե 4 տոկոս (կուսակցությունների դեպքում) և 6 տոկոս (դաշինքի դեպքում) քվեներ ստացել են երեքից պակաս ուժեր, ապա երեք առավելագույն  ձայներ ստացածները մասնակցում են ավագանու կազմավորմանը։

Panorama.am- Լավ։ Կազմավորումից հետո ի՞նչ հաշվարկի հիման վրա են բաշխվում մանդատները։
Տիգրան Մուկուչյան- Երբ տեսնում ենք, թե ովքեր են մասնակցում ավագանու կազմավորմանը, դրանից հետո սկսվում է մանդատների բաշխումը։ Անցնող ուժերի բոլոր քվեները գումարվում են իրար, յուրաքանչյուրի կողմ ձանը բազմապատկվում է տվյալ համայնքի ավագանուն հասանելիք ընդհանուր մանդաների թվով, բաժանվում է բոլորի կողմ ձայներին։ Ստանում ենք ամբողջական թվով մանդատներ, եթե մնացորդ է մնում, բաշխվում է մնացորդների մեծության սկզբունքով։

Panorama.am- Այս պահին հստակ ասել, որ այսինչ համայնքում այսինչ ուժի թեկնածուն քաղաքապետ է ընտրվել կամ կոալիցիայի անհրաժեշտություն կա, հնարավո՞ր է։
Տիգրան Մուկուչյան- Այո։ Կան կուսակցություններ, դաշինքներ, որոնք չեն հաղթահարում անցողիկ շեմը։ Այդ ձայները դուրս են գալիս։ Արդյունքում, կարող է լինել դեպք, երբ կուսակցությունը ստանում է 45 տոկոս ձայն, բայց շեմը չհաղթահարած կուսակցությունների ձայները չհաշվելու արդյունքում նա կարող է ստանա մանդատների օրինակ 51 տոկոսը։ 

Այս առումով ԱԺ-ն լավագույն օրինակն է, նույն համամասնական մեխանիզմն է գործում։ Անկեղծ ասած, ես դեռ այդ հաշվարկը չեմ արել։ Հիմա ես նայում եմ, տարբեր մեկնաբանություններ ու հաշվարկներ են, շատերը հաշվում են հիմք ընդունելով 5 տոկոս և 7 տոկոս անցողիկ շեմը, բայց կուսակցությունների դեպքում անցողիկ շեմը 4 տոկոս է, դաշինքների դեպքում՝ 6 տոկոս։