Ձեր վստահելի աղբյուրը

«Մեր պատմության վերջին ժամանակահատվածը բաժանվեց երկու փուլի, առաջին՝ արցախյան 44 օրյա պատերազմն է, երբ ժողովուրդը սկսեց հասկանալ, թե Հայաստանի ներսում ինչ ուժերի և ում հետ գործ ունի»,- ասուլիսում հայտարարեց «Պատիվ ունեմ» խմբակցության պատգամավոր Տիգրան Աբրահամյանը:

Նա նկատեց, որ հասարակության մեջ ցավալիորեն կածիք էր ձևավորվել, թե խնդիրն Արցախի մեջ է, և այն տալով բոլոր խնդիրները կլուծվեն:

«Նույնիսկ դրա համար պետական ուժեղ քարոզչամեքենա մտավ խաղի մեջ՝ ցույց տալու համար, որ Արցախն իրականում մերը չէ՝ Ադրբեջանինն է»,- նկատեց պատգամավորը և շեշտեց, որ այդ քաղաքականությունն այսօր էլ շարունակվում է, իսկ «Շուշին դժգույն քաղաք էր» արտահայտությունն այդ քարոզչության շարունակությունն էր:

Ըստ պատգամավորի՝ այս ամենն այն քարոզչության տրամաբանության մեջ է, ըստ որի՝ փորձում են ցույց տալ, որ Արցախը տալով ոչինչ չենք կորցրել:

Տիգրան Աբրահամյանի դիտարկմամբ՝ նորագույն ժամանակների երկրորդ հանգրվանային փուլը մայիսի 12-ին և նոյեմբերի 16-ին Ադրբեջանի ագրեսիան էր Սյունիքի և Վայոց Ձորի ուղղությամբ, որոնց արդյունքում նույնիսկ պաշտոնական տվյալներով 41 քառ. կմ անցել է Ադրբեջանի վերահսկողության տակ, կորցրել ենք կարևոր դիրքեր, բարձունքներ, հենակետեր:

«Սրանք ոչ թե Արցախի դեմ ուղղված ագրեսիա էին, այլ Հայաստանի դեմ էին և ադրբեջանական զինուժը ոչ միայն չի նահանջում, այլ այդ տարածության մեջ շատ ավելի լկտի պահվածք են դրսևորում»,- հայտարարեց ընդդիմադիր պատգամավորը և, տեղեկացնելով, որ Քարվաճառում և Նախիջևանում Ադրբեջանը Թուրքիայի աջակցությամբ զինուժ է կուտակում, պնդեց, որ վերջիններս նպատակ ունեն կտրել Հայաստանի տարածքը:

«Պատիվ ունեմ» խմբակցության պատգամավորի խոսքով՝ վերջին օրերին կրկին հայաստանցի-արցախցի խնդիրն են առաջ քաշում:

«Նույնիսկ այնքան են առաջ անցել, որ սկսել են հայտարարել, թե Հայաստանից Արցախում պատերազմական գործողությունների մասնակիցներին արցախցիներն են սպանել, որպեսզի Նիկոլ Փաշինանի դեմ տրամադրություններ ստեղծեն»,- տեղեկացրեց պատգամավորը և նկատեց, որ այն արդեն քարոզչություն, ներքաղաքական պայքար չէ:

Նրա խոսքով՝ ներկայում ընդդիմության գործողությունները նման անբարոյականության, ոչ պատշաճ պահվածքի և կամայականություների դեմ պայքարն է, որովհետև խնդիրը ոչ թե իշխանությունը վերցնել-չվերցնելն է, այլ հայրենիք պահել-չպահելը, քանի որ այս իշխանությունն ակնհայտորեն տանելու են երկիրը մաս-մաս հանձնելու գործընթաց:

«Քանի այս իշխանությունը շարունակում է մնալ իշխանության, բնականաբար, չկա երաշխիք որ մենք կքնենք ու կարթնանանք մեկ այլ՝ ավելի լավ իրականությունում»,- ասաց Տիգրան Աբրահամյանը և հավելեց. «Հայաստանի սնանկ իշխանությունների պայմաններում, ցավալիորեն, ադրբեջանական ծրագրերը շատ ավելի հավանական են դառնում, քան մեկ այլ պայմաններում»:

Ընդդիմադիր պատգամավորը շեշտեց, որ ներկայում իշխանությունները փորձում են մարսել այն, ինչ հայ ժողովուրդը կորցրել է:

Անդրադառնալով Արցախի շուրջ ստեղծված իրավիճակին՝ Աբրահամյանն ասաց. «Արցախում ՌԴ խաղաղապահ զորքեր են տեղակայված և այնտեղ տեղի ունեցող իրադարձությունները նաև ունեն ընդգծված աշխարհաքաղաքական ազդեցություն, միջնորդավորված պայքար է գնում ՌԴ-Թուրքիա համատեքստում»:

Աբրահամյանի խոսքով՝ այս փուլում ՀՀ-ի և ՌԴ շահերը բավականին մերձ են և Հայաստանի ցանկացած իշլխանության գլխավոր նպատակը պետք է լինի առավելագույնս քաղել իրավաքաղաքական փաստաթղթային բազայից, որն ընդունվել է վերջին 30 տարիների ընթացքում:

«Այս փուլի սպառնալիքները, որոնք մի կողմից ուղղված են Հայասատնի և Արցախի դեմ, մյուս կողմից Ռուսաստանի և Իրանի դեմ, պետք է  բերել համաձայնեցման և ներդաշնակեցման դաշտ և փորձել եղած խնդիրների դեմ պայքարել համախմբված ուժերով»,- հայտարարեց պատգամավորը, բայց և նկատեց. «Իհարկե. Հայաստանում այս իշխանությունների պարագայում ակնկալել արտաքին քաղաքականության արդյունավետ վարում, որևէ ձևով տրամաբանական չէ»:

Հիշելով, որ վերջին երեք ամիսում Արցախում խաղաղ բնակիչ է զոհվել՝ Տիգրան Աբրահամյանն ասաց. «Այն խաղաղության բարեկամության խայծը, որ գցում են այս իշխանությունները, որևէ ձևով ռացիոնալության հետ կապ չունեն, որովհետև Ադրբեջանի նպատակը շարունակում է մնալ սպանելը հային՝ այս տարածաշրջանը տեսնելով առանց հայի, հետևաբար՝ նման պայմաններում ինչ կասի այս իշխանությունը, դրանք որևէ ձևվ չաշխատող մեխանիզմներ, սուտ, կեղծիք են»: