Ձեր վստահելի աղբյուրը

«Հունիսի 20-ի ընտրությունների և ՏԻՄ ընտրությունների արդյունքների համաձայն՝ «Քաղաքացիական պայմանագիր»  կուսակցությունը 240 հազար պակաս քվե է հավաքել»,- լրագրողների հետ ճեպազրույցում ասաց ԱԺ փոխնախագահ Իշխան Սաղաթելյանը։

Նա նշեց, որ սուտ են ասում ՔՊ-ականները, որ 25 համայնքում հաղթել են։

«Հերթական անգամ մանիպուլյացիա է։ Կարող են միայնակ իշխանություն ձևավորել 14-15 համայնքում։ Մնացած համայնքներում ընդդիմության և այլ ուժերի հավաքած քվեներն ավելի շատ են։ Այստեղ այլ հարց է. իրենք ունեն կցորդ, սպասարկող քաղաքական ուժեր, որոնք որոշ համայնքներում ձայներ փախցնելով՝ կմիավորվեն իրենց հետ և ձևավորեն իշխանություն»,- ասաց Ի.Սաղաթելյանը։

Նա ընդգծեց, որ այս իշխանությունը չունի համաժողովրդական աջակցություն. «Հունիսի 20-ին մարդկանց խոստացել էին անվտանգություն, խաղաղություն, 5 ամիս է անցել, մարդիկ տեսնում են՝ մենք չունենք անվտանգություն, խաղաղություն, ունենում ենք զոհեր, գերիներ, տարածքային կորուստներ։ Հետևաբար, իրենց տրված մանդատը լեգիտիմ չէ, այսօրվա իշխանությունը չունի ժողովրդական աջակցություն, այսօր ամեն ինչ պետք է անենք, որ դա դրսևորվի փողոցում»։