Սահմանազատման ու սահմանագծման հարցում չկատարել քայլեր, որոնք կվնասեն Արցախին. Սեյրան Օհանյան
«Սահմանագծման և սահմանազատման այս զգայուն հարցը պետք է բաց քննարկվի, իշխանությունը խուսափում է հրապարակային դարձնել այն, ինչ տեղի է ունենում ժողովրդի թիկունքում»,- Ազգային ժողովում ասաց «Սահմանազատման և սահմանագծման հիմնախնդիրների մասին» հայտարարության նախագծի հիմնական զեկուցող «Հայաստան» խմբակցության ղեկավար Սեյրան Օհանյանը։
Նա նշեց, որ պայմանավորվածությունների մասին իմանում են կատարված փաստերից հետո։
«Թուրք-ադրբեջանական ագրեսիան, Արցախի տարածքների բռնազավթումը, Ադրբեջանի կողմից Հայաստանի ինքնիշխան տարածքներ ներխուժումը, փաստացի միակողմանի սահմանագծման և սահմանազատման գործողությունները Հայաստանի ինքնիշխանության կորստի և Արցախի իր իսկ պատմական տարածքում միջազգային իրավունքով ինքնորշմանը և գոյությանը լուրջ սպառնալիք են։ Իշխանությունն ամեն ինչ անում էր, որպեսզի կարևոր և զգայուն սահմանագծում և սահմանազատում հիմնախնդիրների քննարկումն ամեն կերպ փակ ֆորմատով կազմակերպվեր և դրա ընթացքում ներկայացված խմբագրված հայտարարության տարբերակին որևէ նոր առաջարկություն չտալով՝ դեմ քվեարկեց»,- ասաց Ս.Օհանյանը։
Նա նշեց, որ, ըստ էության, իրենք հայտարարությամբ պահանջում են՝ գնահատական թուրք-ադրբեջանական ագրեսիային, պահանջում են բոլոր պայմանավորվածությունները կատարել ՀՀ գործող օրենսդրական ընթացակարգերի համաձայն, սահմանազատման ու սահմանագծման հարցում չկատարել քայլեր, որոնք կվնասեն Արցախին, նաև պետության անվտանգության ազգային և միջազգային երաշխիքների ամրապնդման նպատակով բանակն արագ վերականգնել, սահմաններն ամրապնդել, հստակեցնել, կատարելագործել ռազմավարական գործընկերների հետ հարաբերությունները։
«Հայտարարությունը մեր շահերի մասին է»,- ընդգծեց «Հայաստան» խմբակցության ղեկավարը։
Գլխադասային արտաքին հարաբերությունների մշտական հանձնաժողովի անդամ, նախագծի հարակից զեկուցող Մարիա Կարապետյանն ասաց, որ հանձնաժողովը քննարկել է սահմանազատման և սահմանագծման հիմնախնդրի վերաբերյալ «Հայաստան» խմբակցության հայտարարության նախագիծն ու տվել բացասական եզրակացություն։
Նա նշեց, որ այս հայտարարությոան նախագիծն ընդդիմադիր խմբակցության հայտարարություն է, ընդդիմադիր դիրքրոշումները, բնականաբար, կառավարող խմբակցությունը չի կիսում։
«Հայտարարությունը փորձ է անվստահություն հայտնել ՀՀ կառավարությանը բանակցություններում, մասնավորապես սահմանագծման և սահմանազատման հարցում պետության և ժողովրդի շահերը առաջ մղելու պատրաստակամության վերաբերյալ»,- ասաց ՔՊ-ական պատգամավորը։
Նրա խոսքով, հանձնաժողովը կարծում է, որ սահմանազատման և սահմանագծման օրակարգը ոչ թե պետք է փոխկապակցել ԼՂ հակամարտության խաղաղ կարգավորման գործընթացի հետ, այլ տարանջատել։
«Հայաստանն ունի ինքնիշխան տարածք և այն պետք է պաշտպանվի, այդ թվում սահմանազատման և սահմանագծման գործընթացի միջոցով։ Կարևոր է նաև ի նկատի ունենալ, որ Լեռնային Ղարաբաղի հակամարտության խաղաղ կարգավորման հարթակը ԵԱՀԿ Մինսկի խմբի եռանախագահությունն է և կրկին Հայաստանի և Արցախի շահերից չի բխում եռանախագահության ներքո քննարկվելիք հարցերը տեղափոխել կամ փոխկապակցել սահմանազատման և սահմանագծման օրակարգի հետ»,- ասաց Մ.Կարապետյանը։
Ս. Օհանյանն արձագանքեց, որ հայտարարության մեջ որևէ անվստահություն չկա կառավարությանը, ընդհակառակը՝ փորձում է բարձրացնել ԱԺ վերահսկողական խորհրդարանական մեխանիզմների իրականացումը, պահանջում է այսօրվա իշխանությունները, որոնք, իրոք, գտնվում են անվստահության այսպիսի իրավիճակում, իրականացնեն գործողություններ, որոնք դեմ չեմ Հայաստանի օրենսդրությանը և ԱԺ հաշվետվությանը, գոյության ունեցող ընթացակարգերին։
«Հայաստան» խմբակցության քարտուղար Արծվիկ Մինասյանն ասաց, որ այս հայտարարության շուրջ լսումներ են կազմակերպվել, լսել են հասարակական, հանրային, քաղաքական, մտավոր, գիտական հատվածի ներկայացուցիչների առաջարկները։
«Ցավում եմ, որ ներկայացված հակափաստարկը՝ իբր թե փակ ռեժիմով անցկացնել, հիմք է հանդիսանում ընդհանրապես նախագիծն օրակարգ չներառելու կառավարող խմբակցության տեսակետն արտաբերելու համար։
Բայց նախորդ քվեարկությունը, ինչպես նաև հրատապ թեմային նման մոտեցումը, ցույց է տալիս, որ կառավարող ուժը պատրաստ չէ բաց, հանրային, հրապարակային առանձին դեպքերում նաև փակ քննարկումներ իրականացնելուն»,- ասաց Ա.Մինասյանը։
Նախքան նախագծի քվեարկությունը, «Հայաստան» խմբակցությունը 20 րոպե ընդմիջում առաջարկեց։
Ընդմիջումից հետո տեղի ունեցավ քվեարկություն, 28 կողմ, 0 դեմ, 1 ձեռնպահ ձայների հարաբերակցությամբ հայտարարության նախագիծը չընդունվեց։
Արծվիկ Մինասյանն ասաց, որ նկատի ունենալով այս քվեարկությունը, այսօր իսկ նախագծի լրամշակված տարբերակը դրվելու է շրջանառության մեջ և դեկտեմբերի 14-ին ժամը 12։00-ին պատգամավորների առնվազն մեկ քառորդի ստորագրությամբ առաջարկելու են արտահերթ նիստ այս նույն օրակարագով։
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
