Ձեր վստահելի աղբյուրը

«Կորոնավիրուսի հիմանական թիրախային խավը կենսաթոշակառուներն են և ես առաջարկել էի, որպես խրախուսական միջոց, կամավորության սկզբունքով պատվաստվելու դեպքում նրանց միանվագ 10 հազար դրամ վճարել»,- 2022 թ. բյուջեի նախագիծը ԱԺ-ում ներկայացնող ֆինանսների նախարար Տիգրան Խաչատրյանին դիմեց «Հայաստան» խմբակցության պատգամավոր Արեգնազ Մանուկյանը:

Պատգամավորը տեղեկացրեց, որ կառավարությունը մերժել էր առաջարկը՝ ասելով, թե չի գտնում, որ այս փուլում դրամական փոխհատուցման եղանակն այն ուղին է, որը կարող է արդյունավետ լինել նշված խմբի քաղաքացիների առողջությունը պաշտպանելու համար:

«Փաստորեն այս կառավարության գործելաոճն է, որ սիրով դիմում է պատժամիջոցների, ինչպես 7 օրը մեկ վճարովի հիմունքներվ ՊՇՌ թեստ հանձնելը, աշխատանքից ազատման սպառնալիքները, որոնց ներքո պարտադրվում է պատվաստվել կամ վճարովի հիմունքներով թեստ հանձնեն»,- հայտնեց պատգամավորը և եզրակացրեց. «Կառավարությունն ամեն միջոցը մտածում է պարտադրանքի, բայց խրախուսական միջոցը մերժում է»:

Նախարարը պնդեց, որ դրամական խրախուսման միջազգային փորձը դրական արդյունքներ չեն ապահովել:

Տիգրան Խաչատրյանը նաև նկատեց, որ եթե առաջարկը մեկ տարի առաջ լիներ, ապա հնարավոր է այն դիտարկվեր, բայց այս պահին բարձրացել է ՀՀ քաղաքացիների գիտակցումը, որ պատվաստվելն առաջնային է առողջությունը պաշտպանելու համար և կամավոր պատվաստումների տեսակարար կշիռն ավելացել է: 

«Գտնում ենք, որ նման եղանակով միջոցներ ծախսելու կարիք չկա և մեր կենսաթոշակային տարիքի քաղաքացիներին հորդորում, խրախուսում և բացատրում ենք, որ իրենց և հարազատների առողջությունը պաշտպանելու համար դիմեն կամավոր պատվաստումների»,- պատասխանեց ֆինանսների նախարարը:

Արեգնազ Մանուկյանը նկատեց, որ խրախուսման առաջարկը ներկայացրել էր դիտարկելով աշխարհում եղած փորձը և բերեց Ռուսաստաի, Վրաստանի և այլ պետությունների փորձը:

«Հայաստան» խմբակցության պատգամավորն ասաց, որ ոչ թե քաղաքացիների գիտակցությունն է բարձրացել, այլ կառավարության պարտադրանքի տակ են գնում պատվաստման: